Infiammi 11,000 chuang zet te chu infiamna kutpui Olympic a tel turin tunkar hian Tokyo khawpui-ah an mutbu an pulut tawh dawn a. Hrilengin a la kiansan l,oh khawpuia lut tur an nih vang leh infiam tur an nih vangin International Olympic Committee (IOC)  lam pawh an fimkhur hle a, Tokyo 2020 a tel tur infiammi te tan inkaihhruaina chi hrang hrang an siam uluk phah hle. 

Infiammi te tana Covid guidelines 
    Tokyo khawpui an luh atanga ni thum chhung anin quarantine a ngai dawn a, hemi hnu hian infiammi te chuan nitin Covid-19 an kai leh kai loh an in test thin a ngai dawn a ni. Athlete village-a an awm chhungin midang nen an in tlawhpawh tur a nilo bawk. 

IOC chuan athletes ten Tokyo khawpui an luh hmain Pfizer Inc and BioNTech SE, emaw China’s SinoVac Biotech Ltd. siam vaccin la hmasa vek turin an ti. 
Olympic laiin athlete te test positive ta se?

Olympic laia hrikai an awm hlauhthawn thuah IOC lam chuan khuahkhirhna an siam uluk hle a, Athlete te test a positive palh hlauha an hmalak dan tur pawh an duang uluk hle a ni. 

International federations leh IOC chuan Tokyo 2020 Sport-Specific Regulations (SSR) dinin anni hian uluk takin guideline an siam a ni. 

SSR ten ruahmanna an siamah chuan miin Covid-19 a kai a nih chuan infiamna a chhunzawm thei lo ang a, chutih rualin ‘disqualified' anga kalpui lovin bul la tan lo (did not start (DNS)) anga kalpui tur a ni ang.

Olympics 2021 atana khuahkhirhna an siam tlangpui te chu: Athlete te chu nitin an in  test thin ang a, Covid-19 anlo positive hlauh a nih chuan an in withdraw nghal tur a ni ang a, mahse disqualified aiah did not start (DNS) anga kalpui a ni ang. 

Sport tam zawkah chuan player mal emaw team anga positive hmuhchhuah an nih chuan aiawh lak phal sak an ni ang. Hockey, rugby 7s, leh handball-ah bik chuan first round-ah chakin knockout round lut tur pawh nise team positive an nih chuan chak lo zawk team te an lut chho ang. Event thenkhat tennis, badminton leh boxing teah chuan player alo positive a nih chuan an aiawh lak theih a ni dawn lova, an tumpui tur te chu ‘bye’ in an kal tlang ang. Final khel tur player a positive hlauh a nih chuan match khel lovin pahnihna anga ngaih niin silver medal pek a ni ang.