OnlyFans hi app thar lam tak a la ni a, kum li liam ta September 2016 khan hman theiha tlangzarh a ni. London, England-ah hmunpui neiin, a neitu hi Fenix International Limited te an ni. OnlyFans app founder leh CEO hi Tim Stokely a ni. 

Eng nge a nih?
OnlyFans atang hian sum a lakluh theih a, hei hi a lar chhoh na chhan pawh niin a lang. Content creator te chuan an subscriber te atangin direct-in sum an lalut thei a, monthly basis, one-time tips leh pay-per-view (PPV) feature te a awm thlap.

Chutih rual chuan he app hi sex worker te nena inlaichin hnai tak a nih theihna chen a awm a, sum lalut tam ber berte pawh hmeichhia an ni. Milar ten hman an tih hmuh chho a, physical fitness expert leh musician ten an hmang tangkai viau bawk. 
OnlyFans hlutna hi a pung chak hle a, $810,000,000 atanga $936,000,000 inkar vel ni tura ngaih a ni. 

Sum lakluhna hnar
OnlyFans app chu eng nge a nih tih pawh kan hriat chian ve hmain khawthlang nula te chuan an lo hausakpui leh der tawh! Bella American actress Bella Thorne chuan nikum August khan he application hi a hmang tan a, darkar 24 chhung lekin $mtd 1 chuang a lalut nghal der. Bella Thorne hian OnlyFans record a siam nghe nghe a, kar khat a liam meuh chuan $mtd 2 chuang a lalut a ni. 

Bella hian a fans te chu saruak thlalak pho chhuah a tiam a, chumi en nan chuan $200 lai chawi ngai mah se an inhuam hle. Mahse Bella hian ruak thlalak aiah a thlalak naran ve tak chu a pho chhuak ta zawk a, hei vang hian pawisa chawi ngai zat pawh hi a hnuah bithliah a nih pha nghe nghe. 

Kumin April khan Bella Throne record hi an khuam a, a khumtu hi Bhad Bhabie a ni. American hmeichhe rapper Bhad Bhabie hian darkar ruk chhung lekin $mtd 1 zet a hlawh a, hetih lai hian kum 18 mi chauh a la nih avangin social media lamah sawisel a tawk nasa hle.  

January 2020 khan kum 20 mi American Kaylen Ward chuan Australia ramkang tuarte tanpuina turin OnlyFans kaltlang hian $mtd 1 lai a lo tuak ngah ve tawh bawk. 

Tute nge hmang?
Milar zingah OnlyFans hmang an pung chho zel a, chung zingah chuan - Amber rose, Bella Throne, Cardi B leh YouTuber lar Tana Mongeau te pawh an tel. Mipa lamah - Austin Mahone, Tyler Posey, Chris Brown, DJ Khaled leh American rapper Tyga te pawh a bang bik lo. Mizo zingah pawh OnlyFans app hmang hi sawi tur an awm nual tawh.

A him em? 
Thil tha tak pawhin that lohna lai eng emaw tak a nei ve tho thin ang hian OnlyFans pawh hi a duh tan chuan sawisel theih tak a ni ve tho. Thalak leh video sexy tak tak pawh pho lan phal a ni a, hei hi kum lama naupang zawkte tan a him lo thei. Chutih rual chuan he application hmang tur hi chuan kum 18 tlin a ngai thung. OnlyFans hmangtu hi covid-19 len hnuah nasa takin an pung a, mi maktaduai 7.5 vel chauh hmangtu awm thin kha tunah chuan maktaduai 100 an kai chho dawrh tawh a ni.