DOWNLOAD OUR APP

Read latest news on your phone
app-store

Open Letter to Pu Zoramthanga

Apr 26, 2014

Open Letter to Pu Zoramthanga

Open Letter to Pu Zoramthanga Pu Zahawmtak, Tun hnaiah MNF Hnam Runah “Mizoramah Rigging vawi thum a thleng tawh,” tia i thusawi Chanchinbu kaltlangin ka lo hriain, ka lo chhiar a. Kum 10 lai Mizoram Pa ber (Chief Minister) lo ni tawh leh Opposition Party lian ber MNF Party President nihna chelh mektu i nih avangin, i thusawi chungchang hi Chanchinbu kaltlangin zawhfiah che ka duh a, min chhan theih phei chuan a lawmawm ngawt ang. 1. Ringging vawi thum thleng tawh i tih hi eng kum inthlanah te nge a thlen i sawi thei em? Rigging thleng i tihte hi belhchian dawl finfiahna Document, thu leh ziak a ni emaw, a thlalak emaw, a video emaw Mizoram mipuite hmuh tura phawrh tur i nei em? 2. Kum sawm chhung teh meuh Chief Minister lo ni tawh i ni a, tukhum vuanin emaw chal dawm vang vang pawhin han ngaihtuah la, Rigging in tih chhen hi a tak tak anih i ring tak meuh em? Kum 1998 leh 2003 MLA inthlanpui ah MNF in hnehna in chang a, tu party mahin “Rigging vangin MNF an Sorkar” ti an awmlo. Chu thil chu ngun takin lo ngaihtuah la, MLA inthlanpui ah MNF in hnehna an chanin Rigging loh, Congress in hnehna an chanin Rigging tihna ami? Chuvangin, rigging in tih chhen hi Mizo mipuite rilru leh ngaituahna tihbuai tumna leh in Party, MNF an chhuahsan hum hum mek ven nana sawi mai mai i ni lo maw? 3. 1989 MLA inthlan khan Congress in Sorkar-na an la a, chu chu Rigging in ti a, MNF MLA Candidate Pi Lalhlimpuii bawm Durtlang kham ah leh Bung Bangla bul kawngpui Culvert hnuai-ah chhar a ni, tiin Ballot Box te kawng in zawhpui anih kha. Ballot Paper System hmanga Vote kan thlak lai khan MLA inthlan-ah VC inthlan ang hian Candidate mimal-in Ballot Box hran an nei ami? 1993 MLA General Election atang khan Vote ka nei ve tan a, Ballot paper ah kan Vote duh Candidate hming emaw, symbol ah emaw Seal kan chhu in, Ballot Box pakhat ah kan thlak khawm mai thin kha a ni lawm ni? 4. 1998 leh 2003 MLA inthlanpui-a MNF in Sorkar-na in lak khan Party dangin “Rigging vanga Sorkar” tita che se ula, enge i ngaihdan ? Chutiang chuan puh ve ta che se ula i rilru ka hre chak khawp mai. 5.Ballot Paper System hman lai leh EVM hman hnu ah hian inthlanna ah Polling Agent ah ka lo tangve nual tawh a. Ballot Paper System hmanga kan inthlan thin lai kha chuan Vote thlak zawh hnu-ah Ballot box chu Official ten uluk taka kalhin Sealing Wax nen an Seal thlap a, Paper kan thlakna kua pawh chutiang bawka uluk taka Seal-a charin, Polling Agent ten Signature kan pe vek a, hming kan signed hnan vek tihna a nih chu, Vote chhiar dawnin chutiang Signature pek thlap chu a lo hmelhem anih chuan Vote chhiar theih a nilo. Chutianga Signature hmelhem, Vote chhiar theihloh-na ang thil chu Mizoram inthlan ah hian vawikhat mah a la awmlo tih hi i lo hre ve tawh em? 6. EVM kan hman hnu hian Polling Agent ah i la tangve lo in ka ring a, kei chu ka tan tawh avangin ka hrilh ang che, a hmasa berah Vote kan thlakna/kan hmehna leh Vote tla lo record a, lo chhinchhiah tu hi khawl hran, wire hmanga thlunzawm a ni a, a lo record na khawlah hian Baterry hran vuah a niin Electric Current pawh awmlo mahse, chumi Batterry hmanga khawl a nun tlat avang chuan Vote thlak theih reng a ni. Vote thlak hun ral hnu ah Official ten khawl inthlunzawmna hrui zawng zawng phelh vekin, Vote tlak dan lo record tu ber khawla Baterry pawh thlawn nghal vek a ni a, a bawmah dah anih hnuin, chu khawl an dahna bawm pawh chu a pawn kalhna ah Official ten an seal hnu-in Polling Agent ten hming an signed hnan leh vek a ni. Chumi Baterry thlawn chu Vote chhiar dawnah chauh khawl tih nun nan vuah leh a ni thin. Vote tlakdan record tu khawl nunglo (Baterry vuah loh), Strong Room chhunga dah, Sipai silai kengin ni khata darkar 24 chhung an ven tlat hi, Eng Radio Wave chak ber chi emaw, Scientist thiam filawr ber pawn eng remote control mahin an va khawih chingpen theih i ring em? Chumi tifiah tur chuan entirna ka bengzeh ang che, i television, on loh off lai kha Remote control hmangin a volume/sound tih danglam tumin emaw, Channel thlak tumin emaw Remote Control kha han hmet chhin vel teh. Television ber a nun loh avangin awmzia a awmloh zia i hrechiang ngawt ang. EVM Vote tlakna Record-tu khawl Remote Control hmanga Rigging tih thu hi chutiang vel chu a ni e. 7. In tupui em em Mizo mipui ngaihtuahna hruaipen in tumna Upa K.Chhawnthuama, mahni hming pawha SMS thawn ngamlo, Phantom inti, a zinkualna-a EPIC lem R.Lalmawia tih hmang-in a thulakna Michael Chhakchhuak inti leh Lalmuanhlua te hi kan Police viak tha tak tak te hian an man vat dawn tih hi kei aiin i hriatchian zawk ka ring. Chuvangin, he mite pathum thusawi behchhan niawm tak hian khawiah mah EVM rigging tih vel hi i sawilo thei tawh angem? “Mizoram-ah Rigging vawi thum” a thleng tawh ti-a i thusawi chungchangah hian THUDIK hriat duh vangin mi tu-in emaw FIR thehlut ta se, Court ah a finfiahna pek tur i nei angem? Mizoram Politics ah hian “DIKNA” hi Lal ber se ka duh a, “thu romei zam” leh “a ni mai ang a” tih thu ang vel hi kan ram hruaitute hian sawi ching lo ula ka duh a. Tunlai thangthar thalaite hi kan fingve tawh a, kum 1966 hunlai a thalaite ang kha kan ni tawhlo, thil reng reng hi a ni thei em? thei lo em? tih hi ngun taka chhut vek kan ni tawh tih hi i lo hriat ka duh a. Internet Website hrang hrang te bih kualin Lehkhabu rintlak kan chhiar nasa tih hi i lo hriatve mai mai ka duh khawp mai. DIKNAIN A HNEH THIN. I rintlak, Lalchhuana Renthlei Electric Veng, Aizawl, Mizoram.
Share now