Indian documentary feature 'Writing With Fire' chu Oscars 2022 sem turah Best Documentary Feature-ah a lang a, India atanga nomination hmu awm chhun a ni. 

94th Academy Award hi March thla khian sem a ni dawn a, nomination pawh puan a ni tawh.  'Writing With Fire' hi 2021 khan tlangzarh a ni a, hnamhnuai hnung Dalit hmeichhiain chanchinbu a enkawl chhoh dan tarlanna a ni. He documentary hi Sushmit Ghosh leh Rintu Thomas ten a vawi khat nana an siam a ni a, kum 14 hnua smartphone hmanga print media atanga digital journalism-a an zuan luhchhoh dan tarlanna a ni. 

Oscar Award jury Ujwal Nirgudkar chuan, "Documentary tha thlan chhuah zingah India kutchhuak a tel hi ka lawm tak zet a, India mipuite hian Documentary hmangin Oscars a dawn theih tih hi an hre lo a ni. March 27-ah Oscars an dawn ngei ka duhsak e," tiin, Indian documentary zinga Academy Award dawng thei tura thlan hmasak ber chungchang a sawi. 

Academy of Motion Picture Arts and Sciences (AMPAS) buatsaih Academy Award (Oscar) hi March 27, 2022 khian Dolby Theatre, Hollywood, Los Angeles, California-ah sem a ni dawn a, March 1 - December 31, 2021 inkara film tha ber ber thlanchhuah te chhawpchhuah an ni ang.  Kumin hian - Amy Schumer, Wanda Sykes leh Regina Hall te chuan award ceremony hi an host dawn a ni. 

A nep lo!
'Writing With Fire' hi Sundance Film Festival 2021-ah khan premiere a ni a, award pahnih - Audience Award leh Special Jury Award te a hlawhchhuak nghe nghe. He documentary hian ngaihven a hlawh a, khawvel huap pawha chanchinbu lar - The New York Times leh The Washington Post te pawhin an ziak a, The Washington Post phei chuan, "Journalism movie tha ber a ni - a ni reng bawk ang," tiin an tarlang a ni.   

'Khabar Lahariya' newspaper tana thawk hmeichhe journalist ten hun khirh leh hmun ralmuang lo tak atanga report an siam dan te, huaisen taka thudik an puanzar dan ngaihnawm tak tarlan a ni. Heng journalist te hi chief reporter Meera chuan a ho a, khawvel hmasawnna ruala an insiam rem chhoh dan ngaihnawm tak tak tarlan a ni.