India rama damdawi inte chuan oxygen an tlakchham avangin an damlo enkawl tam tak an thi tih an sawi a. Hetih lai hian ram pumah Covid-19 kai leh thihpui chuan record thar a siam mek zel.

India-ah hian ni thum lek chhungin mi maktaduai dawnin hri hi an kai hman a, darkar 24 liam ta chhung pawhin mi 346,786 zetin an kai leh hman.

Inrinni zan khai Delhi-a Jaipur Golden Hospital-ah chuan oxygen an tlakchham avangin mi 20 zet an thi niin thuneituten an sawi.

Sorkar laipui chuan hri kai an tamna leh oxygen indaih lohna a thlen nasatna hmunah te oxygen phur lut turin rel leh air force thlawhna a ruahman.

India-ah hian darkar 24 liam ta chhungin mi 2,624-in an thihpui leh hman a, a hma ni chiahah mi 2,263-in an thihpui bawk.

World Health Organization (WHO) chuan India ram thil tawn mek chu coronavirus-in chhiatna a thlen nasat theihzia tichiangtu a nih thu a sawi.

Kumin kum tir lamah khan India sorkar hian hri hi an hneh tawh niin a inngai a. February thla laihawlah khan hri kai hi ni khatah mi 11,000 vel chauh an ni tawh thin a, March thla khan health minister chuan India chuan hripui lakah hian ‘inkhel tawp lam’ a thleng niin a sawi.

Hemi hnu lawk atang hian hri leng thawh hnihna a intan ta a. Hri chi thar a chhuak a, pun khawm thulh a ni lo va, Kumbh Mela neih a ni a, mi maktaduai tel an kalkhawm reng bawk.