DOWNLOAD OUR APP

Read latest news on your phone
play-store app-store
app-store
Panaji atanga kan zir tur thenkhat
titi ZALEN
Jun 09, 2019
ad
  • C.Lalhmachhuana
  • Aizawl Municipal Corporation (AMC) leh Mizoram Journalists’ Association hruaitute duhsakna dawngin tun hnai khan Goa khawpui Panaji (Panjim tia hriat bawk) chu tlawhin plastic khapna an kalpui dan leh bawlhhlawh an sawngbawl dan te kan en/zir a, ka hlawkpui hle mai. Ka zinna atanga Mizoram leh Aizawl khawpuiin kan zir tur nia ka hriat tlema zawng kan tarlang ve ang e.
  1. Plastic khapna mipuiin an zawm: Panaji-ah hian nikum 2018 atang khan plastic hmanrua (Mizoramah polythene kan tih ang) micron 50 chin hnuailam chu hman an khap a, khapna hi Corporation of the City of Panaji (kan AMC ang hi)-in an chhuah niin mipuiin an zawm tha hle a. Dawrah pawh an zawrh loh bakah mipui pawhin an hmang lo a, a thlakna atan bag tawih thei chi hman a ni. Corporation of the City of Panaji Commissioner Shasank Mani Tripathi IAS chuan plastic khap hi dawrkaite pawhin an zawm tha hle tih sawiin zuar lui man an awm chuan a tum khatna atan Rs. 5000 chawitir an ni a, man nawn leh an nih chuan an sumdawn phalna (trade license) tihtawpsak thin tih a sawi a. Plastic micron 50 chung lam chu hman nawn leh tura sawngbawl a awlsam avangin an khap ve lo tih a sawi bawk.
    Plastic hi tawih ral tur chuan kum nuai eng emaw zat a ngai a, hriselna atana a that loh bakah kan rama leimin siamtu zinga mi a ni a, kan luidung tibawlhhlawhtu anih bawk avangin Aizawl Municipal Corporation pawhin August 1, 2019 atang hian Aizawl khawpui chhungah micron 50 chin plastic hi khap an tum a. AMC khapna tur hi mipuiten kan zawm that chuan a hlawkna têltu tur kan ni dawn a, platic/polythene hi thil tangkai tak ni mah se a that lohna lam hi a len em avangin khawpui dangah pawh an tih theih hi keini pawhin khap/ hmang lo ve ngei ila a duhawm hle mai.
  2. Bawlhhlawh sawngbawl: Panaji-ah hian awmze nei takin bawlhhlawh sawngbawl a ni a, tawihral thei chi leh tawih ral thei lo chite hi thliar hrangin sum lak luhna tha takah hman a ni. Bawlhhlawh bawm hi chhung tinin chi hnih a, a hring leh a dum an nei a, a hringah a tawih thei an paih a, a dumah tawih thei lo an paih a. Bawlhhlawh lakhawmtu an awm a, a bawm dik loa paih emaw, thliar hrang lo emaw chu an laksak duh lo a, chuvang chuan chhung tinin bawlhhlawh hi tha taka thliar hrangin an paih thin a ni.
    Bawlhhlawh tawih thei chi hi ni tin thawktuten an khawn a, a tawih thei lo hi kar khatah tum hnih - Thawhtanni leh Ninganiah an khawn thin a ni. Bawlhhlawhte hi a sawngbawlna hmunah uluk zawkin an lo thlir hrang leh a, a tawih thei chi hi lei tha atan siamin lo neitute hnenah an hralh leh thin a ni. Khawlaia thing hnah tla leh bawlhhlawh tawih theih chite pawh up tawihin lei tha siam nan an hmang a ni.
  3. Bawlhhlawh tawih thei lote pawh hi plastic, bottle, puan leh chi hrang hrangin an thliar hrang leh a, an lilam (auction) thin a, hemi atang hian kum khatah nuai 30-40 inkar an hmulet leh thin a, hman nawn theih loh chi pawh, hal theih chite chu cement factory-ah an hralh a, damdawi leh mihring taksa themte erawh chu a halna hmun bika siam (incinerator)-ah an halral leh thin a ni. Panaji-ah hian bawlhhlawh paihna senso (garbage tax) atan hian chhungkaw tinin kum khatah Rs. 500 an pe a, hotel leh restaurant te chu an bawlhhlawh neih zat azirin an chawi hi a inang lo a, bawlhhlawh paih man hi ennawn a, tihsan tum mek a ni.
  4. Kum 2015 khan Shimla kan kal tumin an bawlhhlawh sawngbawlna hmun hi kan tlawh tawh bawk a, Shimla Municipal Corporation pawh hian bawlhhlawh thliar hran hna hi tha taka thawkin sum lak luhna tha tak an nei tawh bawk a ni.
  5. Aizawlah pawh bawlhhlawh hi thliar hran tum a niin veng thenkhatah enchhin a ni tawh a. Mahse, tuna kan harsatna nia lang hi chu a paihna hmun a ni. Aizawl khawpui bawlhhlawh paihna thar hi a siamtuten an la peih chiah lo a, June thla tawp hi chuan hman theihin an peih dawn niin an sawi a, an peih hunah chuan sawrkarin bawlhhlawh bawm min pekah hian kan paih a, kan bawlhhlawhte pawh kan thliar hran a tul tawh dawn a, hemi hun a thlen a, kan bawlhhlawhte paih mai mai lova suma kan chantir theih hun a nghahhlelhawm hle mai.
  6. Traffic dan an zawm: Panaji-ah hian mihring 40,000 vel chauh an cheng a; mahse, khualzin an ngah thin em avang leh hmun dang atanga hnathawk an awm tam avangin khawpuia cheng let eng emaw zatin an chamchilh reng a. An khawpui kawng hi a zau lem lo a, lirthei a tam em em chungin traffic jam a awm ve lem lo hi an awhawm khawp mai. Traffic a jam lohna chhan ber hi an thuawih vang a ni. Panaji-ah hian zan 3 chauh kan riak chungin India ram khawpui dangte angin traffic duty an awm ve lo a, kan châm chhung hian Traffic Police 3/4 vel chiah ka hmu. An kawngpui hi one way deuh vek a ni a, hei hian traffic jam chu a tihnep phah niin a lang a, hei hi thuhran ni se, a hmun lovah lirthei an dah ‘park’ loh vangin a jam lo niin a lang a. Driver-te an hawihhawm a, mi dang an ngaichang thiam bawk hi an entawntlak hle. Panaji hi Aizawl nen a inan em emna chu two wheeler an uar hi a ni. Kawngpuia lirthei tlan 10 zinga 6 vel chu two wheeler an ni hial awm e.
  7. Mizo thawk an tam: Goa hi India ram state zingah chuan Mizo hnathawk an awm tam berna zinga mi a ni hial awm e. Mizo hnathawkte hi a tlangpuiin intihhlimna leh spa hmuna thawkte an ni a, tunah hian mi 1000 vel hnathawk an awm nia hriat a ni. Hna an thawk nasa a, thenkhat chu tlaivar thak thaka thawkte an nih avangin hei zat Mizo hi awm mah se inhmuhkhawm an harsat hle. A tlangpuiin hnathawkte hian thla khatah Rs. 15,000 vel an hlawh tlangpui a, hei bakah hian an thawh that dan a zirin ‘bonus’ pawh an dawng thin bawk. Kan cham chhung reilo têah pawh hian Mizo nula eng emaw zat kan hmu a ni.
  8. Panaji-a plastic khapna hi mipui chuan an zawm tha hle a, an harsatna ber chu khualzinte an ni. Dawr hrang hrangah ei tur nepnawi leh sweet te pawh eng emaw zat an zuar a, sweet eina kawr hi a leituten dawrah an paih (pek let) zel loh pawhin an ak tha a, a paihna hmunah an paih leh mai thin a ni. AMC hian kan hma lawkah plastic khapna leh bawlhhlawh thliar hran a kalpui dawn a, mipuite pawh kan lo inbuatsaih lawk a tha hle mai. India rama ziak leh chhiar thiam tamna state, society inpawh, Kristian ramah hian Panaji aiin plastic khapna hi a hlawhtling thei zawk a. Chumi atan chuan mi tinin tih theih kan nei vek a, chu chu ‘thuawihna’ hi a ni. Mi dang kuta dah mai lovin Aizawl khawpui faina leh changkanna atan hian mawhphurhna kan nei vek a ni tih i hre thar leh ang u.

Latest News & Chhiar Hlawh