February 28, 2024; February ni 29 atanga March ni 3 chhunga KTP General Conference vawi 60-na neihna tur Ngopa Public Playground-a sak Pandal hlanna inkhawm chu nizan khan neih a ni.

Pandal hlanna inkhawm hi Organising Committee senior vice chairman Upa F. Thanglura'n a khaihruai a, Organising Committee Chairman Rev. E. Ramchullova'n pandal hlanna hun hi a hmang a, Central KTP Finance Secretary Upa F. Zoherliana'n thu a sawi a; General Conference puala buatsaih Souvenir tlangzarh a ni bawk.

Conference hi Ningani zanah palai lawm inkhawmin tan a ni dawn a, a tuk Zirtawpniah rawngbawlna report inkhawm, Jubilee zaikhawmpui te neih a ni anga, inrinni ah Rorel inkhawm leh Central KTP hruaitu thar tur thlanna neih a ni ang.

He Conference thupui atan hian “Midang tana malsawmna” tih hman a ni a, he thupui tlawh chhan hian Conference Speaker Rev Dr.H.Vanlalruata, Registrar, Aizawl Theological College in thuchah a sawi thin ang.

Tun tum hi KTP General conference vawi 60-na a ni a, hemi pual hian inrinni zan inkhawm banah Diamond Jubilee Concert neih a ni dawn a, he hunah hian Mizorama Pathian fakna hla sa, zaithiam lar tak tak te an zai dawn a ni.