Aizawl: Tunlaia hmun hrang hranga Vaimim ei chhetu pangang, ‘Fall Army Worm’ pangang puang nasa lutuk avangin Agriculture Department leh Horticulture Deptt. te bakah loneitute an buai hle.
Pangang (Fall Army Worm) hian Vaimim chauh khawih lovin thlai dang pawh a khawih chhe nasa hle a, department lam chuan tun lai hian khua a lum chhoh zel avangin an inthlahpun chak hun lai a nih avangin a la puang nasa zual dawn nia sawiin, Agriculture Deptt thawktute chuan hetiang thlai ei chhetute hi Pesticide hmanga thah tuma kah tluk tluk pawh a ni ber lo va, a ‘dose’ ang tawk a kah anih loh chuan leh chemical hman tam lutuk hian rannung tangkai dang leh thlai ngei pawh mihring ei tlak loh khawpa a chhuah a hlauhawm avangin Pesticide-a kah tluk tlukin awmzia a neih loh thu sawiin, heng pangangte vawi khata kaphlum deuh duak thin mah ila, an inthlah pun chak em avangin an tui a lo awm hman teuh thin avangin lo neitu (farmer)-te an taihmak zual a ngai a, heng pangangte hi zing leh tlaiah an chet nasat ber thin avangin farmer-te an huan leh loah kal ngunin kut ngei (hand packing)-a mana thah a that ber thu leh ram dang leh hmun dangah pawh hetianga kuta mana thah ngei hi an kalpui nasat thu sawiin chutiang tur chuan farmers te pawhin tan an lak a ngaih thu Agriculture mithiamte chuan an sawi a.
Tun laia lo neitute tibuai mektu pangang hi eng vanga kumina lo puang ta hluai nge tih an hriat mai bik loh thu an sawi a. Tun dinhmunah chuan farmer-ten taihmak chhuah a, an lo leh huanah te kal tama heng pangangte hi an chet hluar hun lai a, a tam thei ang ber an kut ngei an thah hi a him ber niin an sawi bawk.
&&&&&&