India-a parliament building sak thar hawn tur chungchangah sorkar leh eptute chu nasa takin an inbei mek.

Prime Minister Narendra Modi-a’n building thar hi Pathianni hian a hawng dawn a ni.

Eptu hruaitute chuan sorkarin hawngtura president a sawm lo chu ‘danpui anga kal lohna’ a nih thu an sawi.

A hawn ni tura ruat chu Hindutva ideologue VD Savarkar-a piancham a nih bawk avangin an sawisel nasa hle bawk.

Eptu party-te chuan Savarkar-a hi mi tilungrual lotu angin an sawi a, rorel lai, BJP erawh chuan ‘hero’ an ti ve thung.

Eptu party-a hruaitute chuan a pianchama hawn a ni tur chu India ram dintu mi ropuite ‘hmuhsitna’ ti hialin an sawi.

Congress MP Jairam Ramesh chuan sorkarin parliament building thar hawn ni tur hi ‘a dam chhunga Mahatma Gandhi-a dodaltu pianchamah tak’ tih a nih avangin a sawisel nasa hle.

BJP erawh chuan sorkar thutlukna chu tanin building thar chu Indian-te chawimawitu tur a nih thu an sawi ve thung.

Parliament building thar tur sak hna hi January, 2021 atanga tan kha a ni.

Chhawng li niin HCP Design, Planning & Management-in an duan (design) a ni a, Tata Projects-in a sak hna thawkin thu thei zat a pung a, Rs. tluklehdingawn 9.7 zet sen a ni.

Tun hman lai, Britain-in a awp laia mi tawh parliament building pawh a la ding zui zel bawk ang.

Building thar hawn tura ruahmanna hi kar hmasaa puan kha a ni a, eptu party hruaitute chuan ram chhunga hotu ber, President Draupadi Murmu-i sawm a ni ve lo chu an sawisel nghal.

Congress hruaitu, Rahul Gandhi chuan president hian a hawng ngei ngei tur a nih thu a sawi.

“Parliament hi India-a ram rorelna sang ber a ni a, president hi danpui hnuaia thuneitu ber a ni a. Ani hi sorkar, eptu leh mi zawng zawng aiawh awmchhun a ni,” tiin Congress President Mallikarjun Kharge chuan Twitter-ah a tar lang a. “Aniin parliament building thar a hawn chuan sorkarin mipui rorelna hlutna leh danpui thil a ni tih a lantir dawn a ni,” a ti bawk.

BJP thupuangtu, Gaurav Bhatia erawh chuan Congress party-in an sawiselnate chu ngaihzam ngai a nih thu a sawi.

Gandhi-a bik chu ‘hun tam takah hrilhlawktu tha lo’ a nih thu leh ramin ‘hun pawimawh leh chhinchhiahtlak’ a neihte lawmpui duh lo niin a puh bawk.

Congress hian hawnna hun hman tur hi an boycott dawn nia sawi a awm mek a. Kum 2020-a sakna tur lung phum tum pawh kha Covid hripui len lai niin eptu party eng emaw zat an tel duh lo tawh bawk.

Parliament building thar hmelhmang

Parliament building thar hi sorkarin Central Vista Redevelopment Project a kalpui mek hnuaia mi niin project hnuaiah hian Kartavya Path chei that te, vice president chenna thar siam te, prime minister pisa leh chenna thar leh central secretariat nena hmun khata ministerial building dah vekna tur siamte pawh a tel.

Building sakna tur hian October, 2020 khan ruahmanna siam niina lungphum chu December 10, 2020-ah phum a ni a; mahse, sawiselna neuh neuh a awm avangin nghah leh deuh niin January, 2021 atang khan hna thawh tan a ni ta a ni.

Central Vista architech incharge Bimal Patel chuan complex thar hi triangle anga sak a nih thu leh a hmaa complex awmsa bul chiahah a nih thu a sawi.

Kum 150 chuang daih tura ruahman a ni a, lirnghingah pawh him tur leh India ram hmun hrang hranga architectural style chawhpawlha sak a ni a. Lok Sabha leh Rajya Sabha chamber ve ve chu tuna hman lai mek aiin a lian dawn a, hei hi MP pung zel pawh dawl tura tih a ni.

Lok Sabha-ah hian thutna 888 a awm ang a, Rajya Sabha-ah 384 a awm dawn a. Tuna parliament building ang lo takin central hall erawh a nei tawh dawn lo va. Rorelna in hniha member-te a huhova thut a ngaih huna hman turin Lok Sabha chamber chu mi 1,272 thut theihna tura duan tel a ni ta thung a. A chunga chhawngah minister-te pisa bakah committee room eng emaw zat a awm ang.

Square metre 20,866-a zau niin hei hian a kawta sq metre 2,000 a huam tel a, a hmaa mi aiin 10% velin a zim zawk a ni.