Prime Minister Narendra Modi-a hovin Indian dan siamtute chuan parliament building thara insawnsan turin a hlui zawk chu zahna leh lawmthu sawina an hlan.

MP-te hian chawlhkar khat awh tur special parliament session kohvah thu an sawi hlawm a ni.

Modi-a hian May thla khan parliament building thar hi a lo hawng tawh a; mahse, tun thlengin rorel nan hman a la ni lo.

Thawhlehniah hian building tharah session neih a ni tan dawn ta a, hemi hma hian a hlui zawk kalsan lawmna leh hnuhma ropui tak a lo neih tawh lawmna buatsaih hmasak a ni ang.

Sorkarin special session a koh hian eng nge sawiho tur engmah puan leh inhrilh a awm loh avangin eptu hruaitute an lawm lovin sorkar pawh an sawisel phah nasa hle.

Sorkar chuan dana siam tura rawta sawiho tur, bill pariat pharh tur a awm tih an sawi a, sawiho tur hi a tul dan azirin thlak emaw, a hun pawh pawhsei em a ni thei ang.

Eptu hruaitu tam tak chuan kumin kum tawp lamah thlasik thutkhawm a awm dawn tho avangin heng bill sawiho tura chhawp chhuahte hi eng nge tuna sawihova pass tum a tulna chhan an zawt tho bawk.

Indian dan siamtute hi kalphung pangngaiah kum khat chhungin vawi thum - budget session, fur leh thlasik thutkhawm an nei ziah thin.

Thawhtannia session tanah hian Modi-a chuan kum 1947-a India-in British rorelna atanga zalenna a neih atanga ram rorelna in atana hman zahna hlanin a hlutna a sawi chhuak a. Sorkarin ram zalen kum 75-na pual hian kawng hrang hrangin a lawmna a buatsaih tih a sawi bawk.

Modi-a hian building hluiah hriat reng tur thil hrang hrang a tam avang leh nakin zel atan pawha nghawng nei thil a tam tawh avangin chhuahsana a thara insawn chu ‘hun lunghnur tak’ a nih thu a sawi.

“He parliament hlawhtlinna ropui ber chu mipuiin mipui rorelna an rinna a la vawng nung tlat reng hi a ni,” a ti a. India-in hlawhtling taka thlaa a inkah kai thu leh G20 summit tha taka a thlen thu a sawi lang bawk.

Eptu hruaitu thenkhatte pawhin parliament hlui an hriat reng tawh dan tur hrang hrangte an sawi hlawm a; thenkhat erawh chuan Modi-a sorkar sawiselin an zawhna tam tak an chhang lo leh an elpui politics hruaitute laka an chet dan an dem thu an sawi.

Special session neih hma khan Modi-a hian an thutkhawm tur chu ‘a rei lo’ a ni mai thei a; mahse, ‘thutlukna hriat reng tur’ siamna tur a nih thu a sawi.

Ram rorelna lama mi thiam, Chakshu Roy chuan special session koh hi thil thleng zen zen lo a nih thu a sawi a, a chang chuan sorkarin ‘thil bik tak, parliament-a sawi ngei ngai leh ramin eng bung thar emaw a kaiin’ koh a ni thin tih a sawi.

Thla hmasaa sorkarin session a koh tirhah khan eptu hruaitute chuan an sawiho tur ber ‘thup tlat’ a nih avangin an sawisel nasa hle a. Rinthu pawh lengin mi thenkhat phei chuan sorkarin a hun hmaa inthlan emaw, India tih atanga Bharat tia ram hming thlak tur emaw sawiho a tum nia sawi pawh an awm.

Mi dang thenkhat pawhin sorkar hian state rorelna in leh parliament-ah hmeichhiate tana seat hauhna tur a pharh dawn nia sawi pawh an awm a. Thawhtannia session tan a nih pawhin eptu thenkhat chuan parliament pawnah he bill hi pharh phutna an lantir nghe nghe.

Sorkar erawh chuan he bill hi a pharh dawn leh dawn loh engmah a la sawi lo.

Sawiho tur ber hriat lohva koh a nih avanga sawiselna nasa tak a awm hnuah kar hmasa khan ‘tentative agenda’ tihchhuah a ni ta a. Hetah hian bill pali sawiho tur chhawp chhuah a ni a, heng zingah hian chief election commissioner ruat dan chungchang pawh a tel.

Eptu party-te chuan he bill hi an duh lo nghal a, ‘a mipui rorelna kalhmang lo’ tia sawiin, Election Commission leh an officer-te a hrang hlaka an dinna chu a thiat thei dawn niin an sawi a. Hetih lai hian Pathiannia all-party meeting neihah erawh a tel tur zingah an telh loh thung.