Aizawl March 23, 2024 : Mizo National Front-in kumin Lok Sabha inthlanpuia candidate atana an ruat, K.Vanlalvena chuan, “Tun tum Lok Sabha MP thlanna lo awm turah hian Pathian leh mipuite zarah hnehna ka chang a nih chuan kan ram, kan hnam leh kan sakhua a him theih nan Parliament House chhung leh pawnah a tul apiang ti turin ka inhuam a ni tih Zoram mipuiten min hriatpui se ka duh a ni,” a ti.

Nimin khan Aizawl Press Club-ah chanchinbumite kawmin MNF candidate K.Vanlalvena chuan MP a din chhan a sawi a. “Pathian leh kan party hotute zarah kum thum leh a chanve chuang hret Rajya Sabha MP ka lo ni ve ta reng mai a. Ka term kal lai mek hi kum 2026 July thlaa tawp tawh tur a nih avang leh ka term tawp hnuah chuan min thlak turin rulling party MLA-te chuan an party mi an duhsak zawng an theh chhuak ngei dawn tih hriat sa a nih avangin Mizoram, Mizo hnam leh kan sakhua vawng him tura parliament chhung leh pawnah au chhuak zel tura hun tam zawk ka neih theih nan he Lok Sabha MP atana candidate nihna hi lawm takin ka pawm a ni,” a ti.

Rajya Sabha MP a nih chhunga a hmalakna thenkhat sawiin, “Parliament session-ah Mizoram leh hnam tan vawi 15 ka lo au chhuak ve tawh a, zawhna eng emaw zat ka lo zawt tawh bawk a. Parliament session vawi eng emaw zat nei tawhin MLA vote chhiar avanga Mizorama ka haw chhung ni li tih loh chu ka la kal kim a ni,” a ti.

Parliament session-a a thusawite leh Parliamentary Standing Committee on Commerce meeting-a a thusawiah hlawhtlinna eng emaw zat hmuh tur a awm mek nia sawiin, “Man man zawka sawhthing hralh a nih theih nan China atanga sawhthing lak luh titawp tura ka ngenna avanga sawhthing rate lo sang ta nia lang te, oil palm hralhna man tihsan a nih theihna tura ka ngennain hlawhtlinna hmel hmua a chingtu, Kg khat Rs.10 aia tlawma hralhtute hnena Minimum Support Price pek an lo ni ta te, parliament session-a ka thusawi hmasak ber, Mizorama Ayush Hospital cum Training Centre din tura ka ngennain central sawrkar hotute thinlungah rah tha a chhuah mekte hi ka lawm hle a ni,” a ti a.

Hei bakah hian Mizoram khawchhak tlangdunga lirnghing thin ngaihsak tura ngenna te, vawk hri leng tuartute hnena zangnadawmna pe tura ngenna te, Myanmar atanga kan unau Mizorama rawn tlan lutte lo kuangkuah tura ngenna te pawhin rah tha a chhuah niin a sawi.

K.Vanlalvena chuan, “Zofa hnam hrang hrangte kuahkhawm tur leh, he kan ram rawng hi nasa zawka ka bawl chhunzawm theih nan April 19-a Lok Sabha MP thlanna lo awm turah hian ka chhinchhiahna Arsi-ah ngei lo vote turin Zoram mipuite in khawngaihna ka ngen a ni,” a ti bawk.