- Samuel Lalruatsanga

Khawvel nghawr nghing dawt khawpa thawk leh khata Delhi-a thuneihna changtu AAP chu Mizoramah din tura hmalak mek a ni a. Delhi leh Punjab-a an hnathawh atang ringawta teh chuan AAP hi Mizorama thuneitu atan an itawm hle reng a ni. 

Hetihrual hian kalphung tha leh rorelna dik kan tih hi Political Party atanga lo chhuak ni lovin, hruaitu tha leh huaisen atanga lo chhuak a ni tih kan hriat a tha a. Tuna Mizorama Political Party awmsa te hi an Policy leh inzawrh dan atanga teh chuan AAP aia chhe tur an ni bik chuang lo. PC Party-in mipui tana hmalakna tur a duan, Six Basic Needs te hi tun thlenga Zoram mipui mamawh, a taka tihhlawhtin atana duhthusam a la ni reng a ni. 

AAP kaihhruai Delhi Sorkar khu eng vanga tha nge kan tih chuan an hruaitu Arvind Kejriwal-a a huaisen vang a ni a, Punjab-a AAP kaihhruai Sorkar pawh an Chief Minister, Bhagwant Mann dik leh huaisen vanga hming tha an ni. 

Mizoramah pawh tuna kan Political Party neihsa te hi an hruaitute an huaisen phawt chuan Mizoram siamtha a, ram tha zawk din turin an tha tawk em em a. Tunhma lama tih dik loh an lo neih emaw, hriat reng tlak loh thil tihsual emaw an lo nei a nih chuan insiamthat an ngai tih an inhriat a hun hle. 

Thil pakhat ngaihtuah tel ngai erawh a awm! Tuna kan Political  te kal danah hruaitu awmsaten an lal lutuk a, an mahni thlak thei tura ngaih leh an tana hnawhsak deuh ni-a langte chu an duh hun hunah an dah hniam mai thin a. Party chhungah inthlan pawh buatsaih ngam lovin hun rei tak tak thuneihna an pumbilh a, mithar, ram siamthat duhtu tak takte tan a taka hmalak a harsa ve bawk thin a ni (hemi chungchang hi hun dangah chiang zawka chhui la tum ila). Chutiang hmutu thalaiten Mizoramah Political Party thar, AAP din an tum pawh hi a mak hran lo a. Amaherawh chu Political Party lian tak tak 3 bakah Party tesep an awm nual sa tawh avangin hlawhtlin a har hle ang tih erawh a rin hriat theih. 

 Chutihrual chuan Party thar din chu thil tih theih loh leh tihhlawhtlin theih loh anga ngaih tur erawh a ni lo ang. Tuna hruaitu tha, kalphung tha zawk duhna vanga Mizorama Political Party thar din tum mek hi kan ram hruaitu, Politician te hian inhmuhchhuah phah nan hmang se a duhawm hle a. Tuna kan kalphung ang ringawt hi chuan thalaite an lungawi zo tawh lo va, ramin hmasawnna tak tak a pawh pha lo tih hria a, Party thar din ngai kher lova insiamthat nachang hria se ka ti ngawt mai.

A thupui kan vuah ang hian Political Party vanga mihring hi tha ta ringawt a ni lo tih chu tunhnai maia Punjab-a AAP Sorkar hnuaia thil thleng atang khan chiang takin a lang a. An Health Minister chu thla hnih emaw lek an Sorkar chhungin eiruk thubuai siamsak a ngai ve tho a, hruaitu tha leh huaisen an neih vang chauhin hrem a ni ta zawk mai pawh a! Hei hian mihring hi Political Party vanga tha ni lovin, hruaitu dik leh huaisen, kalphung felfai hnuaia tha thin an ni tih chiang takin a lantir a. 

Bhagwant Mann-a kaih-hruai Punjab Sorkar-ah hian eirukna langsar takin a thlen chhunzawm a rinawm loh a, hetiang bawk hian Mizoramah pawh langsar taka thil dik lo, mipuiin dik lo ni ngeia an hriat ang chi hi chu inthup sak tum tawh lovin chhui chian a, a mawhphurtute hrem thin ni ve tawh se a duhawm hle a ni.