Kumtling lo pawngsual a nih thu ka hmuh chang hian ka va na thin em! Hetiang khawp hian a ni maw Mizopa intite kan lo nikhua loh tak? Mahni nawmsak nan chuan mi tihnat kan hreh ta lo a, mi fanu hmangaih laite hmakhua zawng zawng kan tithim a, an suangtuahna thianghlim chu hnawmhneah ngaiin kan tibawlhhlawh a, an hringnun hlimna chu tahnaah kan chantir ta thin chu a nia. An nun tihchhiat chu duhtawk loin an nunna kan laksak thei a, nunrawng tawpkhawkin kan nawmsakna kan um ta . Hetiang ngawt tur a ni lo. Mizopa chu a pa a, hmanah phei chuan an sahrang leh ral laka chhanhimtu leh thlamuantu an ni thin. Mizopa chuan awmnem zawkte a tina ngai lo a, hmeichhia leh naupangte chu an tana hlauhawm leh tina theitu lakah a humhim thin. Hlauin khur thin mah se, a mawhphurhna hlen loh a hlau thin a, a nunna hial pawh hmeichhia leh naupangte tan a hlan ngam thin. Thih chu a hlau lo a ni bik lo, chhan ngai leh tanpuitu mamawh tan a nunna chu hlan a huam a ni zawk. Tunah chuan thil a danglam zo ta. Hmana humhimtu khan a tihthaih a, hmana lainattu khan a diriam a, a thianghlimna vawnpuitu ni thin khan mi bawlhhlawh berah a siam ta. Mizopate hi inenfiah ang u. Naupang, mahnia insaseng thei mang lo pawh lainat zo loa inhrikthlak nana hman fo mai hi a zahthlak lutuk. Mi pawngsual ngam hi a huaisenthlak lo a, insawitheih nana hman chi a ni hek lo. Hringnun kawng bona, van kawng bona leh chatuan meipui panna kawng nuam ber a ni. Sahrang hmaa zam ngai lo, mi huaisen pasaltha thlah Mizo tlangval dik takte hi inkuangkuahin kan ngawi mai mai dawn em ni? Naupang pawisawi lo chu i han rek bet ang a, a nu leh pate’n thei leh thei loa an leisak a thawmhnaw chu i pawtthler ang a, au chhuah tumin a theihtawkin tang mah se , a ka tereuhte chu i hupbet tlat si ang a.Chutihlaia a mangan tur zia chu han ngaihtuah teh. A ke chu lengin a kut vaia inchhanhim tum mah se, naupang rilru thianghlim, thinlung khakna reng nei lo chu dim hauh loin I sawisa ang a, tuihal mah se tui petu a hmu dawn silo. A nu leh pa a ngai em em ang a, a bula awm turin a duh ang a, a thinlung rum ri chuan an hming a lam mawlh mawlh ang. A pa chakzia leh thil tam tak a tihsak thinzia chu hre mah se, chumi ni chuan a pa hmel reng a hmu zo dawn si lo. A mittui far chuan tanpuitu a au ang a, a au thawm lah tuma hriat phak a ni si lo ang. Ngaihtuah la, han mitthla zel mah teh. Kan fanu, kan tunu leh kan unaunute hian keini lo chu humhalha venghimtu an nei lo asin. Reilote atan nuam chu i chen a, an tan erawh damchhung natna tenawm ber a ni asin. Hmangaihtu tak tak tana an serh thianghlim, hlu leh ropui ve ni a an inhriatna, an thianghlimna chu duh hun hunah kan tihchhiatsak ang maw? Hun tawp a hnai tawh, hringnun kawng thar zawh a hun ta. Ropui teh chiam tum suh, I mawhphurhna hlenin i chhia leh tha hriatna kha hmang la, venhim ngai venghimin humhalh ngai humhalh rawh . Naupang thianghlimna leh a nunna laksak duh khawpa mi tenawm leh huatthlala kha engtia rei nge i nih dawn? Nang, Mizo tlangval, i chakzia chu hmeichhiate venghimin han lantir teh le. I kristianpui, Mizopui, ram khata i chenpui chu i diriam ang a, he khawvel hi ning ngawih ngawihin i siam ang maw? Nang Mizo tlangval, pasalthate thisen zawmpui, hmeichhiate thlabar hlaua an nunna thap thin pasalthate thlah kal zel i nih kha i theihnghilh ta em ni? Khai le, thawh a hun. Ral a hnai e. Thlamuantu turin hliampui a tuartir chang hian kan na tawrh hi a thuk bik thin em a ni. Mizo pasaltha, khawnge i awm? Eng emaw lai atang khan kan nun dan hi a inthlak ta hlawk mai. Khawl changkang , in ropui, thawmhnaw nalh ber ber leh lirthei manto tak tak te pawh kan lo hmelhriat ve ta zel a, kan zing chawhmeh rim leh chhun thingpui hmeh pawh a hma nen chuan tehkhin phak a ni tawh lo. Thauna damdawi, intihcherna leh vun tihnalhna chenin kan nei ta a, nungchang piah lamah hmel pawh siamthat theih a ni ta. Hetiang hian khawvel changkanna chuan min la chim ve zel dawn a, rethei bakberh ber pawh a tawngkam tal a changkang tulh tulh dawn. Hetihlai mek hian, kan chhungril nun thatna kan hloh ve tial tial a, aia upate zahna kan tlachham a, zah tura zilhtu pawh a huatawm ta riau a nih hi maw. Hmeichhia leh mipa kan danglam lohzia changchawiin hmeichhe zu in an pung a, kan khawpui kawtthler zau lai deuh hi chu a thim thet thet tawh chuan inzuarte leh a dawrtute hmuh theihin an inlar mai thin. Nu leh pate thununna ngai thei loa tlanbo te, sikula inkhuahkhirhna dan zawm thei loa tlanbo te chenin hriat tur a awm ta reng mai. Pathian thu sawia vak kual a, thlaraubo chhanchhuah tum silo, mahni pumpui tana rawngbawl thin pawh kana wm fur mai thei asin. Khawvel tawp thlengin sualna ten min kiansan dawn lo mah se, engemaw tal hi chu kan thlak danglam thei a ni. Fate zu in haua mahniin nghei tum chuang silo, fate zial zuk ruk haua mahniin sim chuang silo, nupa ni si tawngkam mawi lo tak taka inhau a, kut hial inthlak thintena a fate nun dan mawi leh tawngkam mawi an han zirtir thin chu a sawt mawh awm ngawt mai ka lo ti thin. Hmangaihtu chu hmahruaitu a ni ngam lo a, zilhautu pawh zilh ngai tho a nih avangin kan khawlai nun hi a bawlhhlawh ru riau a ni. Fate’n an chhun ang tih hlauhawm tak tak nu leh pate hian tah an tichhuak thin. Pawngsual tumtu, tualthah pawisa lo leh rukruk chingte hi an hmelah kan hre ngawt thei si lo, pawi an khawih hmaa hriatlawk ngaihna awm hauh si lo hi engtin nge kan tih tak ang le? Anni ang hremna tura dan kan neih hi a nep lutuk nge , a nih tur ang takin kan lekkawh lo zawk? Eng emaw hnulawkah pawngsualtu ngai bawkin mi a pawngsual leh mai te, tualthah tum tawhin tual a that ta nge nge thinte , gas bur leh computer rutu ngai bawkin a ru nawn leh tih thu hriat tur a awm fo mai hi a luhaithlak tak meuh a, thin thi-a kan mut leh hma hauhin pawi an khawih leh fo thin. Awm lo leh kim lo a awm a ni lo maw? VIP atanga BPL family zawng zawng hian engemaw kan tih a ngai? Thil a pawi hnua kawngzawh, police station kawta inhawrkhawm tih vel ringawt hi chu sim ang u. Kan pianthar hian mahni tan chauha nung loin midang tan nung ve ila, nunna hlutzia leh a siamtu zahawmzia hriain, tidamtu nih theih loh pawha hliamtu ni loin, hmangaihtu leh a hmangaih zaha pawikhawih lo tura kawng dinglam zawh turin insiamthar ang u. Thei leh thei loa thil tha tak tih tum kher a tul lo, thilsual kan tih loh hian thil tha tak kan ti a ni. Nang, Mizo tlangval, i tawmbuk atangin rawn chhuak rawh le. Kan ram hi a ke a bai a, hriak hnawihin tuam dam leh rawh. Miten min tlansan zawh dawn hi.