Major Reuben Lalnunthara Hnamte -

Pathian hnaih awmzia: Mizo tawnga a tlukpui awmte chu bulah, kiangah tihte hi a ni  mai awm e. Chu chuan inpekna, inhlanna, engkim ti thei tura huaisennate a keng tel awm e. Hmanlai Mizo  lalte chuan anmahni hnaihtu upa an nei thin a. A tul hun apianga lal tanpui turte, lal kianga dinga rorelpui turte, koh mai theiha awmin lalin kiangah an awm thin a ni.

Engvangin nge Pathian kan hnaih ang?:  Pathian hnaih chu thlamuanna, lawmna a ni. Kan thatlai chuan mi dang mamawh lote pawha inhriat chang kan nei thin. Mahse, manganna tak tak kan han tawh chuan a tawpah chuan Pathian lo chu belh tur kan hre lo. Pathian hlata awm chu boralna a ni. Jona pawh Pathian tlanbosan a tum a, a boral tep a ni. Lal Saula pawhin Pathian a hlat meuh chuan ramhuaiin a tibuai a, a hun hnu lam chu chhiatna hlir a nih kha.

Pathian bula awma amah hnaiha awm chu a zahthlak ve miah loh. Kan lai miah lo va, kan zak bawk lo va, kan thla a muang em em a ni. Khawvel mi ropui leh kan hotute bulah chuan kan zak a, nuam kan ti lo. Pathian erawh chu a hnaihtu apiangin an zawngchhang a, an ngampa a a nuam an ti.

Thalaiten nupui pasal thu-ah Pathian hnaih a pawimawh. Tunlaiah nu pa inthenna tam em emna chhan hi Pathian remruat leh duh dan ni lem lova nupui pasal kan innei tam lutuk hi a ni thei ang em? Thalai nun buai leh harsatna tawk tam tak hi chhungkua vang a ni chawk. Nupa intihthiam lohna leh rinawm lohnate avangin naupang, thlai tam tak nun a tibuaia, chhungkuaah hlimna an hmuh loh chuan an chan tur chu khawlai leh ruihhlo a ni mai. Chuvangin, thalaite hian nupui pasal kan inneih hmaa family planning engkim hi kan ruahman hmasak a pawimawh hle.

Chhhungkua economics leh inrelbawlna tur ngaihtuah hmasa miah lo va, inhmel duh avanga inneih ngawtte hi a pawi thui thei hle a ni. Chhungkua tha leh thalo hian Ram, khawtlang thlengin a nghawng thei a ni. Chuvangin, nupa a insiam inneihna hi i fimkhur ang u. Kan nupui /pasal turah Pathian rawn ila, a duh danin kal ila, Amah hnaih tlat ila, kan tisual lo vang.

Nu leh paten kan fate avang pawhin Pathian kan hnaih a pawimawh. Nu leh pa tam tak chu kan fate avangin kan rum thin a ni. Zan mu hleithei lo leh chaw pawh ei tui mang lova kan awm chang pawh a tam thin ang. Kan fate thu tha tinreng kan fah a, kan enkawl tha hle nia kan hriat lai pawh hian khawvel sualin a tihbuai tlat maite an lo awm leh thin. A pawimawh ber chu kan Fate avangin Lalpa i hnaih ang u tih hi a ni. Lalpa kutah engkim dah ila, kan duhna leh tawngtainate chu a thlawn ngai lo vang.

Kan eizawnna leh hna thu-ah Pathian kan hnaih a pawimawh. Tunlai khawvela min tibuaitu ber pakhat chu eizawnna hi a ni. Eizawnna mumal nei lovin chhungkua tam tak chu an buai mek a ni. Kan chhungkua leh mi mal eizawnna tur kawngah pawh hian Pathian hnaih hi a lova pawimawh em! Lalpa kan hnaih a, kan belh tlat chuan min tithlawn lo vang. Keimah ngei pawh hian ka experienceah ka chiang tawh a ni. 

A tawp berah chuan naupan lai atanga Pathian hnaih chu a kal sual theih loh tluk a ni. Chuvangin, chhungkua hi ava pawimawh em! Chhungkua inzirtirna tha leh kan fate an naupan lai atanga zirtirna tha pel hi a tul tak zet a ni. Thuhriltu pakhat chuan kum 10 – 20 inkarah pianthar hi a tha a ti. Kum upa tawh tak takah chuan a pianthar hleitheih tawh loh a ti a ni. Kum naupang atang piangtharte chuan sual kawng an dai lo bik an ti a ni.

Chuvangin, kan thupuiber tur chu engtik lai pawhin Lalpa hnaih ila; chhungkua a hlim ang a, kan nun a hlim bawk ang, nupui/pasal thu-ah malsawm a ni ang. Kan eizawnna tur thlengin malsawm a lo ni dawn a ni.