Aizawl July 8, 2022 : School Education Complex leh MBSE Regional Office, Lunglei-a hawn naah Chief Minister Zoramthanga chuan, "Pathianin a tawk tein, kan hun zelah kan mamawh min pe thin. Pathian ropuizia kan hriat theih nan leh hma kan sawn a, Amah kan chawimawi nan Pathianin zirna min pe a ni," a ti.

Chief Minister chuan, "Beisei phak baka ropui leh changtlung, education hmun hawn a lo ni ta hi a lawmawm hle a. Hma lo la hmasa te chungah lawmthu ka sawi duh. Sum tam tak senga hmun ropui tak sak a ni leh zirtirtu leh thawktu rawih a ni hi, sawrkarin Education pawimawhzia a hriat belh zel vang a ni. Kan suangtuah phak bak changkanna leh hmasawnna a thlen belh zel dawn a ni," a ti a. Mi zawng zawngin kan um a, kan buaipui tlan theih ber chu zirna hi a ni a. Zirna hi mihringte min ti mihringtu leh mi pangngaia min siam a, eizawnna min siamsaktu a ni, a ti bawk. 

Vawiin khan School Education Complex leh MBSE Regional Office, Lunglei, Education Conference Hall-ah a ruala hawnna hun hman a ni a. Zoramthanga, Chief Minister chuan khuallian niin a hmanpui a. Pu Lalchhandama Ralte, Minister, School Education Deptt. chu khualzahawm a ni. School Education department hmun pawimawh hawnna hunah hian  C. Lalrosanga, MP (Lok Sabha) chuan a telpui a.  JH Zoremthanga, Chairman, MBSE chuan thu a sawi bawk a. Dr. H. Lalthlangliana, Director, School Education Deptt. hnen atangin technical Report ngaihthlak a ni bawk.