Aizawl: Lalruatkima Minister chuan Lunglei-a Mizo Hnam Run a tlawh a, amah lo dawngsawngtu mipuite hnen-ah, “Pathianin MNF sawrkar Zoramthanga kaihhruai hi hriak thihin mal a sawm a ni,” a ti.

I&PR Minister chuan, “MNF sorkar hi lo ding ta lo se zu avangin eng zat nge kan invuiliam leh ang? Zu avanga nunna chan kan kiam ta duai duai te, zu avanga fahrah leh hmeithai kan tlahniam zel te hi a lawmawm tak zet a ni. ‘Pathian leh kan ram tan’ titu Pu Zoramthanga kaihhruai sorkar hi kawng hrang hrangin Pathianin mal a sawm a ni,” a ti bawk.

Ruatkima chuan, “Tuikuk ten an duh thu ngeiin Mizoram an chhuahsan a. Harsatna nasa tak Mizoram min siam. Tripura-a an awmhlenna turin ruahmanna siam a ni ta. Congress kha la sorkar ta se Central sorkar khuan Pu Hawla sorkar kha tihpui tlakah an ngai ang em? Tripura sorkar pawhin an duh ang em? A hun takah Pu Zorama sorkar hi Pathianin Mizote buaina chingfel turin a hungchhuak a ni,” a ti bawk.

"MZU Southern Campus a hun takah hawn phalna pek kan ni a. A lawmawm tak zet a ni," tiin, "CAB bill pass a ni dawn a, kan duh lo nasa hle a. Central sorkar-in tih tlang an tum ruh hle mai si a, Union Home Minister lo zin ?umin CAB tihtlang an tum a chian tak em avangin, Chief Minister bakah tlawmngai pawl hrang hrangin Mizoram min awl (exemption) an dil a, chumi bawhzui chuan Delhi ah NGO- Central YMA, MZP, Pol Party aiawh MNF, Congress, ZPM, BJP & NCP aiawh ten Union Home Minister an zuk hmu leh bawk a, khang hunlai khan beiseina a chau em em a, CM, Mizoram MP leh tlawmngai pawlte nawrna a nasat em avangin CAB-ah telh loh kan ni ta a ni. Sorkar hmasa kha Mizoramah la sorkar ta se CAB laka kan awl theihna tur hi an nawr chhuah a rinawm lo hle. Pu Zorama sorkar hi Pathian hriak a thih in mal a sawm tih a chiang hle a ni," a ti bawk.

Lunglei Mizo Hnam Runa Minister dawnsawnna programme hi Lawmawma Tochhawng, President Lunglei Sub Hqrs MNF leh Lunglei HPC Vice Chairman-in a kaihruai a ni.