Aizawl September 29, 2023 : Congress Party chuan Prime Minister Narendra Modi-a'n ni dang a awm reng laia 'Ram pum faina ni (Cleanliness Drive)' atan October 1.2023 (Pathianni) a puang lui ngat chu chuan ngai thutak hle a. BJP in Kristian te an target leh namnul an tum zia tichiangtu-ah an ngai tih thuchhuah an siamah an tarlang.

Kristian te ni serh leh Pathian biak ni faina hnatlang neih hi Central YMA pawhin remchang loah an ngai chu Congress Party chuan lawmawm a ti a. Mizoram Kohhran Hruaitute Committee (MKHC) in Prime Minister hmalak dan duh loa nidanga sawn tura an hmalakna chu lawmawm an tih thu an sawi. Congress Party chuan, "Theihtawpin MKHC leh CYMA hmalakna hi kan tawiawm zel dawn a. NGO leh Political Party te pawh BJP in Kristian sakhua palzut zawnga a chetna min do pui turin kan sawm a ni," an ti.

Congress chuan, September ni 17.2023 (Pathianni) khan Pathianni chawhma-ah 'PM VISHWAKARMA SCHEME' chu DoNER Minister B.L Verma chuan Vanapa Hall-ah tlangzarhna a lo nei tawh bawk a. Lohtheihlohin minister te leh official te pawhin an telpui a ni," an ti. 

"Kristiante hunpui pawimawh khawvel ram tinin an zah em em, Krismas ni tak pawh 'Good Governance' Day ah a puang a. Hetianga BJP ten Kristian ni pawimawh Pathianni-a pawisak leh zahpahna nei loa programme an siam lui tlat hian Kristian sakhua a him loh zia a tichiang a ni," an ti bawk.