Aizawl : Mizoram sawrkara Principal Consultant, Aviation Wing J. Lalhmingliana’n Pathianniah thlawhna service a awm lo tih sawiin, August 7, 2022 (Pathianni) atangin a awm theih an beisei tih a sawi.

ZALEN zawhna chhangin J. Lalhmingliana chuan Covid-19 leng vangin Lengpui Airport-a Pathiannia thlawhna service awm thin chu tihtawp a lo ni tawh tih a sawi a, chu chuan official-te bakah khualzin veivakte tan harsatna tam tak a thlen avangin Pathiannia service a awm theih nan hma an lak thu leh August 7, 2022, Pathianni atanga service thei tura hma an lakna chu a hlawhtlin ngei a beiseiawm thu a sawi.

Principal consultant sawi danin July 13, 2022-a Lengpui Airport license tawp chu thla ruk a tan tihnun leh nghal a ni a, Airport Authority of India (AAI) danah kum hnih thleng tih theih ni mah se, tunah chuan AAI lamin reilo tete atan chauh an pe thei a, chu chu state dangah pawh an kalpui dan niin, thla ruk dana enfiah zel thin tura ruahmanna an siam vang a ni.

Tun dinhmunah Lengpui Airport-ah thlawhna service company pathum - Alliance Air,  IndiGo leh Air India (Tata) te an awm mek tih J. Lalhmingliana chuan sawiin, ni khatah thlawhna pariat tum changte pawh a awm tawh thu te, khualzin tam ni, Inrinniah chawhrualin passenger 1,650 atanga 1,800 vel an awm tawh thu te a sawi.

Mizorama helicopter service tha zawk leh lian zawk a awm theihna turin Mizoram sawrkarin hma a lak thu te, Ministry of Home Affairs pawhin a pawm tawh thu bakah a hlawhtlinna tur atan a hmalakna hrang hrang (tender chhuah etc.) chu MHA kut a nih thu te principal consultant chuan sawi bawkin, chumi ang chuan MHA hmalakna ngaihchan mek a la nih thute a sawi bawk.