Aizawl April 1, 2024 : Chief Minister Lalduhoma chuan nimin ni 31.3.2024, Easter Sunday khan Aizawl North Treasury leh South Treasury te tlawhin an hnathawhte Pathianni-a a enfiah chu MNF chuan pawi an ti a, Pathianni zah lo CM neih pawi an ti.

Chief Minister hi Adviser to CM (Finance) TBC Lalvenchhunga leh official ten an tawiawm. MNF chuan, "Mizoram Chief Minister, kohhran Upa lehnghalin Pathianni, Pathianni-ah pawh Kristian-te ni pawimawh bik Easter Sunday bawhchhia a, sawrkar office tlawha an hnathawh a enfiah hi Mizorama thil la thleng ngai lo a ni a. Pathianni ni lo, office enfiah leh tlawh hun tur a tam tehlul nen Pathianni kher office tlawh nana Mizo CM-in a hmang duh hi MNF chuan mak kan ti a, Mizoram CM-in kristianna a lak thutak loh zia leh a lak lap zia a lang chiang hle a ni. CM Pathianni zah loh kan nei hi a pawi hle," an ti.

MNF chuan, "Inthlanpui leh thil pawimawh dang Pathiannia ruat a nih thin dodala Mizo Kristian-te kan lo tanrual tawh thin laia, kan CM berin Pathianni zah lo taka chet a la ta mai hi pawi kan ti hle a. Hun kal zel turah Pathianniah thil pawimawh India sawrkar-in Pathiannia a rawn ruat leh a nih chuan kan CM hian mawh thuk takin a phur dawn a ni," a ti bawk.

CM hian Kristian CM a nih hi hre rengin tun hnuah chuan Pathianni zah tawh turin MNF chuan Lalduhoma hi an chah bawk a ni.