ZALEN September 25, 2026 : Central YMA chuan September ni 28-30, 2026 chhunga ram pum huapa bank hnathawktu ten nawrh huaihawt an tum avanga Public Sector Bank leh Regional Rural Bank-te Pathianni, September ni 27, 2026-a inhawng tura thutlukna siam a ni chu pawi an tih thu an sawi.

Central YMA chuan, 'Mipuite tan tluang taka bank hna hi kalpui ṭha a ti a, hetih rual hian kan sakhua leh nunphung hi min zahsak se a duh a. Mizoram cheng tam berte hi Kristian sakhua zuitute kan ni a, chuvangin, Chawlhni hi Pathian biakna, ṭawngṭaina leh sakhaw serh leh sang hman hun anih avangin tunhma aṭangin dawr leh sumdawnna hmun hrang hrangte pawh khar ṭhin a nih thu an tarlang.

Central YMA chuan, Ministry of Finance, Reserve Bank of India (RBI), bank thuneitute leh Mizoram sorkar hnenah he thutlukna hi Mizoram bik tan kaltlangpui chi a ni em tih ennawn leh turin a ngen a; kawng dang, entirnan - bank hawn hun chhung pawhsei, ATM tihchak leh digital banking tihhmasawn emaw, mamawh bik tana emergency service siam theih ni se an duh tih vawiina Central YMA thuchhuah chuan a sawi.

Central YMA chuan awlsam taka mipui ten bank an dawr theih hi ṭha a tih rualin, bank hnathawktute sakhaw vawn leh an dikna te, Mizoram mipuiten sakhua kan ngaihpawimawhna hi zah sak ni se a duh a. 

Mizoram sakhua leh khawtlang nunphung nghawng thei thutlukna reng rengah thuneitute chu state sawrkar leh a kaihhnawih pawl hrang hrangte nena sawihona mumal tak neih hmasak hnu ah chauh kalpui ṭhin ni se a duh a, hemi chungchang hi siam rem theih ni se a duh hle a ni, an ti.