Punjab sawrkar chuan nimin khan mobile internet leh SMS service te chu Patiala district-ah a titawp a, chutihrual chuan voice call erawh hman theih a ni thung. Anti-Khalistan march avanga ni hnih chhung buaina chhuakah hian hliam tuar pawh an tam tawh hle.  

Tuna service tih tawp rih hi home affairs and justice department thutlukna a ni a, inbeihna chhuahna hmun Patiala-a Kali Mata temple bawr velah chuan security an dah hnem hle. Inbeihna a chhuah hnu nhian Patiala-a internet tihtawp a ni piah lamah police lal pathum chu an awmna sawn nghal an ni.

Senior police officials pathum te chu chief minister Bhagwant Mann thutlukna anga sawnchhuah nghal an ni a. CM Mann hian Inspector General of Police (IG) Patiala range, Rakesh Aggarwal, Senior Superintendent of Police (SSP) Patiala, Nanak Singh leh Superintendent of Police (SP) Harpal Singh, te chu sawnchhuah nghal an nih thu CM office lam hian an puang nghal.

Mukhwinder Singh Chinna chu IG Patiala atan ruat nghal niin, Deepak Parik chu SSP Patiala-ah dah a ni a, Wazir Singh chu Patiala SP thar atan ruat a ni bawk

Punjab CM Bhagwant Mann chuan Zirtawpni khan thil thlen chhan hi chhui chiang turin thu a pe nghal a, police officer lian pawh ni se he thil thlengah hian tumah zuah an nih loh tur thu a sawi. Mi pawimawh bik te ko khawm nghalin Mann chuan DGP chu thil thleng mek vil reng turin a hriattir nghal. Official te chuan AAP sawrkar thar chu dan leh thupek kenkawh chungah a fir hle dawn niin an sawi a, tumah remna ti thuanawp zawnga khawsak an phal dawn lo, an ti.