ZALEN January 8, 2025 : Cyber Crime Police Station CID (Crime) ten report an dawn danin 2024 chhung khan case 41 an ziaklut a, heng zingah hian pawisa vanga thubuai ziahluh (Finacial Crime) a tam ber a, hur sualna avanga thubuai (Sexual harassment) ziahluh chuan a dawt.

Heng thubuai avang hian mi 30 man an ni a, pangnga chu kum tling lo an ni. Thubuai siamsak hi mi18 an ni a, case 2 tharthawh niin, case 15 chu ngaihtuah tura dah rih a ni a, state dang nena inkungkaih case 8 chu ngaihtuah tura la dah rih niin state dang nen inzawm la chhuichhuah theih loh 7 a awm a, case 16 chu ngaihtuah leh tura dah rih a ni bawk. Heng thubuai avang hian convict erawh an awm lo.

2024-ah hian National Cybercrime Reporting Portal (NCRP) atangin Financial Crimes-ah hian case hrang hranga atanga sum hmuh let hi Cheng 89,61,995 a ni a, pawisa la hmuh leh loh hi nuai 92.61 a ni a, a vaia belhkhawm hi Cheng 1,82,22,995 a ni. Financial Crimes avang hian mobile phone 106 chu blocked a ni.

2021 atang khan December 16, 2024 thleng khan Cyber Crime-ah hian case 296 ziahluh a ni tawh a, heng thubuai avang hian mi 106 man an ni a. Mi 38 convict an ni tawh a ni.

2022 kha Cyber Crime-in case an ziahluh tam ber kum a ni a, case 188 ziahluh a ni a, hemi kum hian convict pawh mi 17 an awm a, convict tam ber kum a ni. Hemi kum vek hi Financial Crime ziahluh tam ber tum a ni a, case 107 ziahluh a ni. 2023 kha Sexual Harassment avanga thubuai ziahluh tam ber tum a ni a, hemi kum hian case 19 an ziaklut.