A mak ka tih thin pakhat chu hei hi a ni. Heti khawpa rilru nghet loh hnam kan ni chung a (ti tawp teh ang), ‘pawl (institution) laka rinawm’ ngaihlu em em mai kan ni tlat hi ka thil hriatthiam theih loh tam tak zinga pakhat a ni awm e. Hemi chungchang hi sawi zui deuh tham a awmin ka hria.
Entirna atan Pu Lalduhoma (ZNP/ZPM) leh Pu C.Lalrosanga (MNF MP candidate) te hi an tha awm e, hemi kawnga sawi an hlawh fo avangin (an case a inang a, paradigm example an ni e ka tihna chu a ni lo; mahse, hman an remchanna lai a awm).
Anni pahnih chungchangah hian mi tam tak chuan anni hian engvangin nge an pawl a chhuahsan, chhuahsanna awm a ni em, a ni lo em, tih lam ngaihtuah aiin pawl an chhuahsanna lai chauh kha kan la vawng em em, mi rintlak lo leh mi rilru nghet lo anga chhuahin, ar-chuk-tuilo khawp hiala chhuah kan duh ta zel chu a nih ber hi. Hetiang rilru kan put chhan hi tam a awm thei ang: kan pawl an chhuahsan vang, pawl/party tuinû hak vang, etc. A chhan lian pakhat ni a ka hriat ve chu: pawl rama rinawm tlurna rilru vang a ni tih hi a ni.
Mizote hian ‘principle (nun thuvawn) leh values a rinawmna aiin pawl (institution) laka rinawmna hi kan ngaisang zawk a ni’ tih a tilang chiang hlein ka hria. Pu Duhoma hi a hranpain ka tan lo na a, hemi kawnga an beihna a chhàn letna hi thui tak a dikin ka hria ‘ka zuan lawr ngamna hi ka inchhuanna a ni’ tih lam hawia a sawi hi. A dik vek ka ti lo (a boruak pawh ka hre ve vek phak lo), mahse a thusawiah hian principle a rinawm thu leh pawla rinawm thu chungchang, thu thûk tak a inphumin ka hria. Kan pute pahnih thlavang hauhsak hi ka tum a ni lo va, anni leh hetiang hun tawng mi dang tam tak nun kawng a?anga kan ngaihtuah ngai thil pakhat ka rawn phawrh mai a ni.
Miin pawl a chhuahsan chhan chu kha pawl khan a innghahna thurin leh kaihruaitu thuvawn (values, ideology & doctrine) leh a dan/kalphungte a pensan tak avang pawh a ni thei. Chutiang case a lo nih hlauh phei chuan a pawl chhuak lo leh mi ngheta inngai zawka te kha ‘mahni principle leh pawl thurinah pawh chiang lo (chutiang principle pawh mahni a lo nei lem lo)’ kan lo ni letling daih thei. Ka sawi tum ber pakhat chu: ‘pawl rilru in a bual-ât thinlung a?ang ringawt ni lovin, fim, fel, leh fing taka chhut nachang kan hriat a pawimawh. Ka awmna pawl hi a thuthlungah a ding em, a dinna leh a thiltih dan hi a dik em’ tih chhut theihna, chhut thiamna, chhut ngamna neih a ngai a ni. Mi tam takin chu chu kan ti thei lo, thudik leh thutak zawn aiin kan pawm dan tinghet tur thu leh ngaihdan kan zawng zawk fo. Thu dik zawngtu nih ngam hi thil ?ul tak a ni, mahse huaisenna, inngaihtlawmna, leh rilru inhawng neih a ngai thung awm e. ‘Pawl chhuak, mi rilru nghet lo, etc’ tih ?awngkam hmanga kan in sawi thin avanga mite ngaiha chutiang mi anga lan hlauhna in mipui nawlpui min man beh dan te, chu hlauhna chu power kawltu institution/organization leh chumi a hruaituten an lo hlawkpui daih dan (power analysis) lam chu kan sawi tel seng dawn lo a ni.
Mi, a rilru a ngheh loh vanga zuang lawr a awm thei. Kan hre tlang. Eng emaw hleka titau zel theite pawh kan awm ang. Mahse, principle a chian avanga pawl chhuak a awm theih bawk. Protestant hovin kan pû ber pakhat Martin Luther te pawh kha pawl chhuak dik tak a ni e (Mizo tawngkamin). Kan duh dana pawl a kal loh apianga tihtauh emaw pawl chhuah thu kan sawi lo va, thutling chin, principle leh conviction khawih chin, Chanchin Tha ngen chhun chin thu a ni ka sawi ber ni.
Tin, institution/organization (kohhran, pol. party, NGO, etc) laka rinawm hi a tha lo tihna pawh a ni ngawt lo. Hetiang rinawmna hi hlut pawh hlu tak a ni. Mahse, a him loh theih dan a awm tih erawh hmuh thiam ve a pawimawh ang. Tin, heng rinawmna chi hnih te hi thliar hran ngei ngei tur an ni lo va, an kal thiang thei a ni. Chuvangin, an kal kawp theih chhung chu an kal kawp tur a ni ang. Pawl chhuahsan lova siamthat chi, siamthat tum chi issue a awm thei ang. Danglamna tha a thlenna tur atana dawhthei taka kum tam tak nghah ngai chi issue a awm mai thei. Pawl a awm ve zel ti rem tawh hlawl lo thu/issue a awm thei bawk awm e. Hreh tak chunga ‘diriam leh deusawh, mi chirhthehna leh vawm zuina, mi kawmserh leh thinhrik nih te, vantlang mit leh kohhrana tlaktlum loh phah vang vang hial pawh huama’ mittui tla chunga kawng dang zawh a tul hun a awm thei bawk ang. He kawng hi zawh tur meuh chuan chiang, huaisen, mi nghet tlet tlawt nih a ngai letling daih awmin ka hria