Argentina chuan World Cup qualifier-ah Bolivia hnehin Lionel Messi chuan hat-trick a siam a, he inkhelhah hian South American history-a international goal  thun tam ber record chelh mektu football legend Pele-a record khumin record ropui a siam a, mual chhungah a tap hial a ni. 

He inkhelhah hian Argentina chu 3-0 in Bolivia lakah an chak a, goal zawng zawng hi kum 34 mi Messi thun vek a ni. Ti hian a ram tan goal 79 a nei ta a, Messi hian goal 79 thun tur hian match 153 zet a khelh a ngaih laiin Brazilian Pele thung kha chuan game 92 lekah goal 77 a nei thei a ni. 

Buenos Aires, an muala mipui 20,000 chuan hmaah Ballon d'Or tum ruk dawng tawh Messi leh a pawl te hian Copa America nopui an chawi chhuak a, an ram mipui hmaah an chawi tha leh ngat a ni. Messi leh a pawl te hian hmanni lawk khan Brazil ramah entu mipui awm manglohnaah Copa America nomawi an chawi a, chuvangin an ram mipui hma ngei a chawi lan ve ngei an duh a ni. Argentina captain chuan, “He ka suangtuah ram thleng tur hian hun rei tak ka nghak tawh. Tunah ka thleng ve ta,” a ti. Mittui parawl kiang chungin, ''Hetiang aia ropui leh thaa lawm dan ka thim lo a ni,” a ti thlawt bawk. Messi hi World Cup leh Copa America-ah a chet chhiat thin vangin dem a hlawh thin a, chung te chu tunah chuan a thai bo ta rih a ni. 

Paris St Germain lama Lionel Messi team-mate Neymar Jr. chuan ram tan goal 68 nei ve tawh bawkin Pele-a dawt ah a awm a, South American goal khung tam  pathumna a ni.