Aizawl January 26, 2025 : Sawrkar hnathawk officer pension tawh, lirthei leh driver chhawr/hmang chhunzawm an awm tih sawrkarin a hria a, a rang thei ang bera titawp turin thupek chhuah nghal a ni.

Commissioner & Secretary, Govt. of Mizoram General Administration Department (GAD)-in January 20, 2025-a office memorandum a tihchhuaha tar lan a nih danin Mizoram sawrkara officer pension tawh thenkhat, officer thawk laite tan chauha ruahman, sawrkar atanga hamthatna, lirthei leh driver-te pawh huamin chhunzawm an la awm tih sawrkarin a hria a, sawrkar chuan he thil hi a ngai thutak hle.

Lirthei emaw driver hmang zuitu officer pension tawh zawng zawngte chu department-ah thawn kir nghal tura hriattir an ni a. Phalna nei loa sawrkar thil neih hman zui chu dan bawhchhiatna a ni tih office memorandum-ah chuan tar lan a ni.

He thupek hi tikhawtlai lova zawm ngei ngei tur a ni tih head of department-te hriattir an ni a. Heng thupekte hi zawm lo an awm a nih chuan a kaihhnawih officer pension tawhte emaw, department hotute emaw chungah sawrkarin action a la ang.

Mizoram state sawrkar chuan discipline khauh taka vawn a tum avangin he office memorandum hi khauh taka zawm a beisei tih tar lang bawkin, a kaihhnawih department-te chu he thil hi ngai pawimawha a tul anga hma la nghal turin a ngen bawk.