Aizawl: March, 2020 khan India ramah petrol man hi cheng 30 chungin a sang hman a, diesel man hi cheng 27/- chuangin a sang hman a, hei hi Mizoram-ah pawh a nih dan a ni a, Nimin thleng khan Aizawlah petrol man hi cheng 103.7 a ni a, diesel hi cheng 94.79 a ni thung. Lirtheia sumdawng lam chuan harsatna an tawh thu ZALEN an hrilh.

Petrol leh Diesel to chhoh tak em avang hian lirtheia sumdawng lam pawhin an buai tan tawh thu ZALEN an hrilh hlawm a. Mizoram chhung leh pawna Sumo service lam chuan rate hi tihsan tumin hma an la mek niin thu dawn a ni a. 

Two Wheeler Taxi khalhtu pakhat chuan, “Sawrkarin rate a tuk anga tlan tur chuan petrol man sang tawh nen, patling ni khat hlawh a tlem duh khawp mai,” tia sawiin an hotute’n sawrkar dawr an tum niin a sawi bawk a.

Aizawl City Bus Owner Association lam chuan Sawrkarah an rate tisang tur hian an lo ngen tawh a, mahse, an chhanna hmuh ang chuan kumin hi chuan an rate hi tihsan sak an nih hmel loh thu ZALEN a hrilh a. 

Car rentals lam chuan tuna an rate siamsak ang pawha an tlan hleih theih loh avangin rate tihsan lam chu an nawr mai loh tur thu an sawi thung. 

Oil phurtu Tank-lorry neitu lam pawhin an rate hmanlai chu an duhkhawp tawh loh thu ZALEN an hrilh a, Mizoram sawrkara nawr in a awmzia a neih ve lo thu leh rate sang tur hian Oil lama thuneitute hnen lamah an thlen tawh tih an sawi.

Mizoram Taxi Association lam chuan oil man sang hi an buai phah hle tih an sawi a, chutihrualin Covid-19 avangin hmalakna an nei thei lo niin ZALEN an hrilh a, committee an neih hmasak ber turah an sawiho dawn tih sawiin an hmalak dan tur a la sawi theih loh tih an sawi.

Taxation Department, Mizoram Joint Commissioner Thansanga hnen atanga ZALEN thudawn danin tunah hian Mizoram sawrkar hian Petrol-ah hian tax 25% a la a, Diesel-ah hian 14.5% a la thung. Hei hi June 1, 2020 atanga hman tan kha a ni a, a hma kha chuan tax hi Petrol-ah 20% lak thin niin Diesel-ah hian 12% lak thin a ni. 

India ram state hrang hrang zingah Mizoram hi oil man sanna zingah chuan a tel lo a, chutihrualin a tlawmna pawl zingah pawh a tel chuang lo a laihawl hnuai lam zingah a awm a tih theih ang. 

Tun dinhmunah Andhra Pradesh-ah hian oil man a hniam fal hle a, hetihlai hian an thenawm state Madhya Pradesh chu a to na ber a ni thung. India khawpui lian - Delhi, Kolkata, Mumbai leh Chennai zingah Mumbai chu oil to na ber a ni a, Chennai chu a tlawmna ber a ni thung.

A tlangpui thu in Mizoram oil man hi Assam oil rate-ah a innghat thui hle a tih theih a, Assam ai hian petrol leh diesel man hian cheng khat bawr velin a to deuh zel a, chutihrualin Meghalaya-ah erawh Assam aiin a tlawm zawk. Manipur leh Nagaland-ah erawh Mizoram aiin oil man a sang thung. Tripura pawh hian Mizoram aiin oil man an ti sang zawk a, Arunachal Pradesh chu hmarchhak ho zingah hian a tlawmna ber a ni. Oil man inthlauh chhan hi state sawrkar te tax lak dana innghat a ni, Hmarchhak bikah chuan Mizoram aia tax la sang 3 leh la tlem 3 an awm a ni.

July 1, 2021 ah khan Delhi bikah petrol-ah hian Central tax (excise) chuan cheng 32.90 an la a, diesel-ah 31.80 a la, state hian value added tax (VAT) angin petrol-ah cheng 22.82 an la a, Diesel-ah 13.05 an la thung. Hetiang zat an lak atang hian centre lam hian Crore nuai 3.7 an lalut a, state lam hian Crore nuai 2 vel an lalut anga chhut a ni.

Tuialhthei (fuel) hi GST in a huam ve loh avangin state sawrkar tan hian an budget puitu tha tak a la ni reng a, chuvangin tuialthei tax hi GST huam chhunga rinluh hi an la duh lo reng a ni.