Mizote hian Human Trafficking (mihring hmanga sumdawnna) chanchin hi kan hre ve ta viau a, kan hmelhriat dan pawh kan Mizo nulate ngei a tuartute leh a vanduai-a te an nih vang a ni e te pawh ti ta ila kan sawi sual tam vak lo ang chu maw! “Mi tam takte chu an lo fing anga…” tih ang mai khan mi tam zawkte hi chu kan fimkhur ta hle mai a, harsatna tawk thawm pawh kan hre ta rih lo; tin, mi tam tak phai lama hna thawh tumten an kal hmain Police-ah leh NGO te leh a lo awm tawh sate zawh fiah phawt nachang kan lo hre ta a, hei hi a tha hle mai. Chutih lai vek chuan mi thenkhat chu kan fimkhur luatah kan hlauthawng lutuk a, Chhura ang maia a sen hrim hrim hlauh ang maia phai leh ram pawna hnathawh hrim hrim chu hlauhawm leh tha loa ngai ringawt kan awm ve nual bawk a, an demawm hauh lo a ni. India ram hi kan thang nasa em em a, hei hian mi tam tak hnathawh tur a siam a, a bikin service industry kan tih ang chi, Hotel-ah te, Massage parlour-ah te, Resort leh retail lam te leh kawng dang dangah sumdawnna a thangin chu chuan hnathawh tur a tipung nasa em em mai a. Mizo thalaite tam tak chu tunah hian heng Service Industry-ah hian an thawk fer fur tawh a, kawng pawh a inhawng zau hle a ni. Service Industry hnuaia thawk tur hian post tam tak chu Degree leh thiamna bik neih ngai chite a nih rualin thiamna sang leh lehkha zir sang lo, mi taima leh tuarchhel tan chun thla khata sing chuang hlawha thawh tur hi a tam a, rilru nei phei chuan in lamah an chhungte pawisa an thawn let sup sup mai a nih hi. Kan hlauhthawn leh kan rin dan ang chiah hian hmun tam takah chuan mihring hlutna leh zahawmna pawisa miah lova inchhawrluihna te, nawhchizawrh luihtir te leh chutiang lo pawha an hlawh chungchang anmahni ruaitutena an bum avanga harsatna tawk ta te, Mizorama an awm laia an sawi hmuh ang leh tiam ang lo deuh a lo nih avanga buaina tawk ta te, a then chu Vairama la kal ngai miah lo leh zeizia pawh hre lo lutuk avanga buaina tawk ta te, a thente chu an mahniin an zir loh hrim hrim avanga harsatna tawk ta te, chaw ei hun leh ei ang a lo inan loh avangtea harsatna tawk ta te, lungleng vang leh tawng inman tawn loh leh eng emaw dang hotê vanga buaina tawk ta te an tam mai. Hotel leh Resort changkang deuhah chuan Spa parlor an nei zel a, khawpui lianah chuan Spa parlor hi sumdawnna tha tak a nih avangin a tam em em a, miten Spa parlor hi a bikin kar tawp chawlh hman nan an hmang nasa a, he sumdawnna hian sum pawh a hailut viau a, chutianga sum hailut tha tur chuan thawktu pawh an indaih a ngai a, englai pawhin spa therapist thiam tak ni lem lo tan pawh hna hmuh a awlsam reng a ni. Hetih lai hian tunhma lamah kan lo aupui fo tawh ang khan heng Spa parlor te hi mipat hmeichhiat hman khawlohna kawngah nasa takin hmun tam takah an lo mualphoin vawiin ni thleng pawhin chu chu kan hmuh dan leh thil ni thei a la ni reng a ni. Chutiang a nih avang chuan hetiang hmuna thawk tur hian fimkhur a ngai em em a. Mahse, heng Spa parlor zawng zawngte hi chutianga nawhchhizawrh leh tha lo taka sumdawnna kalpui chu an ni vek lo tih erawh chu kan hriat a tha a, Mizo thalai tam tak therapist hlawhtling tak tak pawh an awm a ni tih kan hriat ve pawh a tha ang. Manager leh Senior Trainer nia an Company hotute pawhin innghah nan taka an hman ka hre teuh mai. Hetiang hmuna thawk tur hian thiamna sang tak neih a ngai lem lo va, Matric pass lem lo tan pawh thla khata sing chuang hlawh theihna a nih ve tlat mai avang hian hnualsuat ngawt chi a ni bik lem lo. Theihtawp chhuah inhre chiang lo leh a mik a mak hre map lote chu phaiah hetiang hna thawk lo turin kal lo se tiin kan infuih thin a; mahse, a hlawh a that em avang te, company tam takin hlawh bakah commission tha tawk an pek bakah tips tha takte an la dawn cheu thin avang hian a hip a nain hlauhawm leh fimkhur ngai deuh thil mah nise thalai tam takte chu ni tinin India ram khawpui hmun hrang hrangah Spa parlor-a thawk turin an liam reng tho a ni. Hetiang a nih avangin tuna kan tih tur pawimawh ber chu mite hnenah kal suh u inti ringawt lo hian, him zawk leh tha zawk leh ngialnghet zawka miten thiamna sang leh sum leh pai nei lo mah se hna an thawh theihna tur atana hmalak mai hi niin ka hria. Mizoram chhungah chauh hna zawng lo turin kan infuih kan infuih a, kan thalai hna zawng mekten ram pawna him zawk leh tha zawk leh zahawm taka hna an thawh theihna tur hi a fawng chelhtu lamte hi chuan an ngaihtuah sauh sauh a ngai a ni. Hotel-ah te leh Service industry dang dangah te him leh tha zawk, zahawm zawka hna an thawh theihna tura tanpui a hmalakpui hi a hun tawh a ni. Eng hna pawh hi miin tih takzeta dan bawhchhe loa amah intunnun nana hman chuan hna zahawm lo a awm lo reng reng a ni. Chumi atana kan tihhmasak tur nia ka hriat chu pre counseling neihpui hi a ni. Mi tupawh, a bikin thiamna mamawh sang vak lem lo hna, a bikin Spa Industry te, Foreign-a domestic worker tur te, factory leh manual work thawk tur ang chi te chuan Aizawl an chhuahsan hmain pre counseling an paltlang ngei ngei a, clearance an neih ngei theihna tura ruahmanna siam hi thil tangkai tak a nih ka ring. Chu chuan mi tam tak arkhawthim dai lutuk taka mi rama an kal tur a tanpui viauin a rinawm a. Tin, Employment problem solve-na tha tak a nih dawn avangin Labor & Employment Department pawh hian an Labor Officer te hi he lamah hian chhawr tangkai thiam ve ta deuh se. Kawtlaia vaichhang kawt zuam em em, vai hrim hrim chu pawng hlau lo leh hmusit ve ringawtte kha an ni thin si a, chutiang a nih avang chuan, clearance neih ngei ngei a ngaih tlatna turin ruahmanna siam a tha khawpin ka ring a ni. Vairama Mizoten harsatna kan tawh tam tak hi chu keimahni mawl luat vang leh vai zia kan hriat loh vang a ni chawk. Tin, kan Sorkar hian a mite a ngaihsak a ni tih hi anmahni ruaitute hian an hriat ngei ngeina turin ruahmanna tha tak siam chhuah theih a nih ka ring, anmahni ruaituten an zuam em em ringawt mai chuan human trafficking kaihhnawih kher loah pawh hlawh chungchangah te leh company-in an thawktute puala hamthatna an pek thin tihsak duh loh kawngah te harsatna an tawk fo thin a ni. Tin, a kal tur leh kal tumte pawn an kal hmain an thawhna tur hmun a theih chen chu hriat tum a tha a, Spa leh body massage-na hmunah te, Hotel leh Service industry hmuna thawk turten kal hmain an thawh tur ang chi chu training emaw, engtin emawa lo zir thiam lawk theih hram a tha a, Vaitawng kan thiam lo a nih pawn mahni inhaikaw thei tur tawk talin Saptawng zir thiam hram hram tum tur a ni. Spa parlor-a thawh tum tan Experience pawh nei lo, training pawh nei miah loa phaia chhuk ve rawih hi a him lo tawp a ni tih hriat tur. Aizawlah ngei pawh training theihna a awm nual tawh a, hengah hian basic tal training neih phawta kal a tha, experience pawh nei lo training pawh awm loa mi chhawr tur rawn zawng thinte hi rin loh phawt a him ber. Thiamna pawh nei lo chhawr duhtu chuan thiam kher ngai lo thil atan a chhawr duh a ni mai thei a ni. Singapore lama Domestic helper hna thawh chungchangah pawh hian ngaihtuahna kan siam a pawimawh, kan thalai tam takten tunah hian eizawnna atan hmangin an luhchilh mek a ni a, chutih laia an chhungkaw dinhmun leh mamawhna dan te hriatpui hauh loa hmusit taka lo tawngkhuma, lo diriam tawk lah kan bang chuang bik lo a, mahni ina nu leh pa te thawhchhuah ringa monthly income pawh nei hawt lo hian mi hna thawhte hi FB lam atangte hian theihtawp chhuahin kan diriam ta mai thin a. Tuarchhel tur leh rilru puitling tak pua hrehawm tawrhchhuah dante pawh hi kan inzirtir a ngai a ni. Mizote hi thil intihhmuh chi tih takah kan intihhmuh dan tam takte hi chu chhawm nun zui tlak loh chu a tam vein ka hria, mi Singapore-ah an inhlawh tih kan hria a, dan mang lo pawhin kan han chho ve rawk rawk a, a lo hahthlakin a hna a lo hniam viau mai si a, chutah thawk tluan peih loin an haw a, in lum an lo thlen hnuah mi dang tana tui loh rawkna tur khawpin an sawi hnawng leh a, hlawhtling taka thawh tur anga thawk tlangte hi chuan a hrehawmzia leh tawrh chhel a ngaihzia te leh kal ve duhte tana thurawn tha tak an sawi chhuak thin. India ram a ni emaw, foreign-ah a ni emaw, a bikin heng kan han sawi tak ang chi hna thawk tura kal tumte reng reng hi chuan an kal hmain training mumal tak leh counseling tha tak an paltlang ngei ngei hi a pawimawh hle a ni. Mizoram Youth Commission kan nei hlauh hi a lawmawm hlein ka hria a; amaherawhchu, tunah hian a tangkai dan tur angin kan la hmang thiam lo nge kan duh lo ka hre lo, thalai hna zawng mekte pawhin eng nge an tih tih hi an hre kher lo mai thei a ni. He commission hi tun aia changtlung hian sorkar pawh hian thuam sela, thalaite tan a nih ang ngeia tun aia chhenfakawm lehzual tur hian a la siam theih ka ring tlat a ni. Chhura ang maia a sen apiang hlau ringawt lo a, him zawk leh tha zawk leh hlawk zawka kan thalaiten ram pawna hna an thawh a, hmasawnna kailawn kan rah zel theih nan a titheitu leh a fawng vuantu (Stake holders) te chuan ngaihtuahna an sena hma an lak hi a va tha dawn em, chutiang a nih chuan Human Trafficking laka him tak chungin thalaiten phaiah hna an thawk suau suau tawh mai dawn a ni. Invenna tha tak nen hlawhtlinna chu kan chang theuh thei a ni. - JIMMY LALTLANMAWIA