Aizawl: Sawrkar laipuiin mi hauisente hnena chawimawina a pek thin, ‘Uttam Jeevan Raksha Padak’ chu tunhnai khan Phullen khua mi pahnih Lalliansanga S/o PL Vanlalhruaia Diakkawn veng leh Vanlalduhawma S/o Sakhawliana Field veng te hnenah hlan a ni.
Thudawn danin ni 28.3.2018 (Ningani) khan F.Lalruatfela leh Joel Lianthangpuia te bike khalh lai chu electric hruipui chatin Tuivai bulah a man a. Hei hi an hnung chiaha tlan, bike-a inphur, Lalliansanga leh Vanlalduhawma te chuan Current hlauhawm tak karah an thiante chu chhanin F.Lalruatfela (19) S/o F.Vanlal nghaka nunna chu chhan hman a ni lo a, Joel Lianthangpuia hi a tirah biak theih lohin a awm a; mahse, enkawl a nih hnuah a dam chhuak leh a ni. India President chuan January 25, 2019 khan hetiang lama huaisen chawimawina, Uttam Jeevan Raksha Padak Award dawng turin a thlang ta a ni.
Mi pahnihte hnenah hian ni 3.5.2019 khan Mizoram sawrkar Home Department kal tlangin Award ken tel pawisa fai Rs.1,50,000/- pek an ni a. Award Medal hi sawrkarin hun remchang hmasaah an la pe leh dawn a ni.