Aizawl March 22, 2024 : Vawiin khan MNF President Zoramthanga chuan Parliament (18th Lok Sabha) inthlanpui lo awm tur atan MNF Candidate a puang a. Candidate tur chu Rajya Sabha member ni lai MNF General Headquarter NCC member nilai K. Vanlalvena a ni. MNF candidate chuan pi leh pu chhuan tur a neih ve loh thu a sawi.

Lok Sabha MP Candidate K. Vanlalvena chuan MP candidate atana ruat a ni chu lawmawm a tih thu a sawi a. "Inthlan campaign nan sum leh pai ka nei lo. Pi leh pu atangin belhfakawm chhuan tur ka nei lo. Mipuite khawngaih beiseiin Pathian leh kan ram tan ka rawn pen chhuak dawn a ni," a ti.

"NDA leh INDIA (UPA tih thin) inepna karah regional party-te kan tel ve dawn a ni a. Mizoram MP chuan sawrkar siamnaah kori kan tu phak lo. NDA hi a sawrkar leh ngei a rinawm - Uniform Civil Code an rawn tipuitlin pawh a rinawm. Chuvangin NDA sawrkar do a tul nasa dawn. Term kal mekah NDA sawrkar dodal nasa ber pawl ka ni. MP fang tan thiltih a harsa, amaherawhchu au bengchhen a ngai," a ti.

"Hindi thiam a pawimawh an tih laiin kum thum leh a chanve chhunga thu sawi lo an la tam mai. Hindi leh English thiam aiin rilru put hmang a pawimawh zawk. Tin, English thiam lutuk aiin ka sap tawng thiam dan hi a tawk chiah, an hrethiam zawk," a ti a. "Lok Sabha-ah hian min thlang tling a nih chuan Mizo tawngin thu ka la sawi ang," tiin Mizoram mipuite vote a dil nghal a ni.