Aizawl April 1, 2024 : Vawiin chhun dar 12:00 khan ZPM Party chuan Lok Sabha MP Election Campaign bul tan inkhawm Vanapa Hall ah an hmang a, ZPM Party President Lalliansawta chuan MP Election Campaign hi a Kick-Off a, thahnemngai tak leh felfai taka Campaign theuh turin Party Mi leh sa te a sawm, an party candidate Richard Vanlalhmangaia chuan Pathian thu a ngaihpawimawh tur thu a sawi.

Kick-Off inkhawm ah hian MP Candidate Richard Vanlalhmangaiha chuan thu sawiin, “Zoram mipui hian ZPM hi enchhin min tum lova, en tak tak min tum a ni. Mipui ten min beisei anga hna pawh kan thawh ngei ngei a ngai a, kan ram enkawl hna hi Pathianin kan kutah a dah a, a malsawm tlaka enkawl pawh kan tum tur a ni. MP te hi central leh state inkar palai tur an ni a, Pathian zara ka lo tling a nih chuan he hna hi rinawm tak leh tha taka thawh ka tum a ni. Central atanga project leh scheme a tam thei ang ber hai chhuah kan tum dawn a, Pawisa hi dik taka hman atan chuan central hian a ui reng reng lova, rinawm taka hnathawh chuan project hai chhuah leh hmasawnna thilah harsatna a awm dawn lo a ni,” a ti bawk.

Richard-a chuan, “Prime Minister emaw, Chief Minister emaw thu nilovin Pathian thu ka ngai pawimawh dawn a, Pathian thu ang zelin ka kal dawn a ni. House chhungah a ni emaw House pawnah a ni emaw kan ram, kan hnam leh kan sakhua tan theihtawp ka chhuah dawn a, ka thisen far tawp thlengin ka ding dawn a ni. ZPM policy Hand Holding policy tihlawhtling turin theihtawp ka chhuah dawn bawk a, kan state hian Emporium kan mamwh hle mai a, kan thil thar chhuahte pho chhuahna tur Emporium tha tak kan neih theih nan hma ka la dawn a ni. MP inthlanah hian vote a tla tlem thin a, tun tum inthlanah chuan mipuite vote thlak vek turin kan in sawm a ni,” a ti bawk.

Chief Minister Lalduhoma pawhin thu sawiin, “MP kan inthlang dawn a ni a, ZPM chuan Delhi tlangah zawmpui kan nei lo va, hei hi kan danglamna a ni. Issue based-in Parliament thurel pawh a thlawpin a thlawp lo mai dawn a, hei hi kan tan chuan a him ber a ni. Central nena tha taka thawh dun hi kan duh a, amaherawhchu kan ram, kan hnam leh sakhaw tana him lo thilah chuan huai takin kan didal mai dawn a ni. ZPM chu tualto party kan nih avangin tuna kan dinhmunah hian kan chiang a, kan awm reng dawn a ni. He kan dinhmun hi chiang taka min hriatsak turin mipuite pawh ka ngen duh a ni," a ti.

MP dinhmun sawiin, "MP hi palai hna thawktu tur a ni a, a tirtu Mizoram sawrkar nena thawk dun thei a ni dawn a, project um zui ngai a tam hle thin a, hetiang bawhzui tur atan hian MP tha kan mamawh a ni. Tin, Zofate hmun hrang hrangah kan inzar darh nasa ta hle a, heng te enkawl thei tur hian MP tha kan mamawh hle em em a, MP tawng lama harsatna nei lo hnamdang kara lo khawsa reng tawh leh hria MP Candidate kan nei hian hmasawnna kawng tin rengah nasa takin kan tangkaipui ngeiin ka ring a, kan ramin a mamawh tak MP min thlantlin sak turin Mipuite ka sawm a ni,” a ti.