August 29, 2023;  POCSO case vanga man C Laldawngliana (59) s/o C Lalsawmliana (L), Kolasib Venglai East chu bail-a chhuah a nih laiin bail condition a bawhchhia a, hei vang hian man leh nghal niin, Kolaisb district jail-ah dah a ni.

Kolasib Aw in a tarlan danin, pawikhawihtu a puh C Laldawngliana hi police service lai niin, tunah hian Prosecution Branch, District Court-ah a duty mek a, a nu nena khawsa naupang kumtling lo a khawih avangin July 18 khan a lakah FIR thehluh a nih hnuah man a ni.

A hnu lawk July 26 khan bail hmangin chhuah a ni a, hemi chhung hian POCSO tuartu nia sawi naupang te chenna in bulah hmuh a nih avangin naupang leh a nu hian nuam lo an tihthu an sawi a, Child Welfare Committee, Kolasib chuan Fast Track Court Judge, Addl District & Session Judge ni bawk Julie Lalrinzami hnenah complaint an siam a ni. 

Court chuan bail condition a bawhchhia nia sawin C Laldawngliana chu August 23 khan a bail order a cancel sak a, man lehnghal turin police te hi 'Warrant of Arrest' a pe zui. Court-in man lehnghal tura a hriattir chungin police te hian an man lawk lova, police lam chuan a court dawnah man an tum thu hi chanchinbu mite an lo hrilh a ni.

Hemi chungchangah hian Kolasib chanchinbumi te chuan Addl District & Session Judge hnenah hian court-in order a chhuah dan an zawtfiah a, court chuan 'Warrant of Arrest' order chhuah anih tawh chuan accused chu man nghal tur anih thu an sawi a, hemi ang hian Kolasib police te chuan nimin chawhnu lam khan C Laldawngliana hi man in court-ah hruai a nih hnuah medical tih a ni a, hemi hnu hian District Jail-ah thawn tura tih a ni.

DCPU thawktute chuan POCSO case-a man zingah bail-a chhuah emaw bail dil emaw an la awm ngai lo niin media mite zawhna an chhang a, C Laldawngliana hi bail awm chhun ala nia an hriat thu an sawi.