Chief Minister Lal Thanhawla chuan Department Secretary te’n an department te tih hmasawn nan hmanni lawk khan rawtna thehlut turin a ti a. Rawtna te chu lut tawhin CM chuan hma a la tan chu a ni der mai. Sawrkar hian department te chu hmasawn tir a tum hlein a lang hrih a, a lawmawm hle a, hetiang kan nih chuan hun rei lote chhungin mipuite’n hmasawnna an hmuh a beisei awm a ni. Department lian ber pawl leh enkawl hautak zet mai Home Department-ah kut thlak a ni tan dawn a, Home Minister chuan police chhawrtlak lohte chu chawlh tir dan tur ruahmanna siam a tum a ni. Police tam tak chu an duty piah lama an pute’n hna an thawh tir thinte an ni a, he inchhawrna phei hi chu a lar hle a mipui pawhin an hria a ni. Department thenkhatah pawh an officer te’n office hna ni miah lo an mimal hnaah an tir fo thin a, police department ah phei chuan a hluar lehzual a, in sa tur thlengin an inchhawr thin a ni. Heng thil thleng hi mipui lamin hre mah ila a titute an zak hauh lo a, sawiselna karah an ti lui zel tho a, thenkhat hi chuan intihtheih nan an hmang emaw tih mai tur a ni. Sawrkar hian department te hmasawn tir a tum a nih chuan a khauh a ngai dawn a, sawrkar hmasa lamah pawh khan police officer te’n an hnuai ami mimal thila an chhawr tih tawh loh sawi rik a ni tawh a, mahse a tak ram kan thleng thei meuh lo chu a ni. Chuvangin khawng taka a thil tum hi sawrkar hian keng khawng sela, sawiselna an tawh a rinawm loha, sawrkar a khauh zawh poh leh mipuiin sawrkar chu an thlawp zawk dawn a, sawrkar tha tiin an sawi tawh zawk ang. Police-a hna thawk tur chuan taksa hrisel a pawimawh hle a, an hna hi hna dang a ang lova, hna hram tak tak khawih ngaih chang a awm a, nunna thapa chetchhuah hun a awm thin bawk a ni. Dan leh thupek kengkawh tura lak hran an ni a, chumi atan chuan insawizawina khirh tak tak an paltlang thin bawk. Hetiang a nih avang hian ruihtheih thil avanga hna tlin lote chu ngaih zam mai mai chi a ni lo a; hriselnain a tlin ngang loh a, post hahdam deuh a dah a remchang lo a nih pawhin police hna a ni miau a, chawlh inhuam a ngai hial ang. Police thenkhat chu an hmel atangin an thil chin hai theih a ni lo a, uniform ha chunga rim nei an awm fo thin a; heng hi chu an hruaitute hian hrem ngam sela a tha khawp mai. Police hnaah chuan zan lam duty a awm a, taksa chhawk nana hmang an awm thei a, mahse police hna chuan heng hun hrehawm tak tak te hi hahrfima paltlang a keng tel tlat a ni, Leh lamah chuan an pu thenkhat te’n sipai te chu an hna piah lama an chhawr thin avangin an zah let lem lo a ni thei a, hetiang hi a nih phei chuan inthunun (descipline) hleih theih a ni hauh lo ang. Uniform hian mahni inthununna a keng tel a, hmang sual ai chuan lak loh hlen ngam a a fuh zawk ang. Engpawh nise sawrkar hian department siam that hna hi chhunzawm zel sela, mipuiin beiseina nen an thlir reng bawk a ni.