Aizawl; Aizawl veng pakhata hmeichhe naupang kumtlinglo thihna chungchangah police-ten Protection of Children from Sexual Offences (POCSO) Act hmangin thubuai an ziak lut tawh a, child protection lam pawhin Social Investigation Report (SIR) an buaipui dawn.

ZALEN zawhna chhangin Aizawl SP, C. Lalruaia chuan hmeichhe naupang kumtlinglo thihna chungchangah naupang humhimna dan, POCSO Act hmanga thubuai an ziah luh chu bawhzui mek zel a ni tih sawiin, he thu ziah lai, nimin tlai thleng kha chuan mihring man erawh an la nei lo tih a sawi.

He thil thleng chungchangah hian child protection lam pawhin Child Welfare Committee (CWC) atanga thupek an hmuh angin, naktuk atangin SIR an kalpui theih an inbeisei tih ZALEN an hrilh a, naupang boral ta chhungte, an awmna khawtlang/veng leh damdawi in thlengin thil awm dan an chhui chiang/zawtfiah dawn tih an sawi a, an report azirin CWC chuan hma a la chhunzawm dawn niin an sawi. 

“POCSO leh CWC thubuaiah SIR kalpui a ni thin a, Juvenile Justice Act-in ti tura a phut angin naupang dang an awm em, chung mite chu an him em tih te thlengin chhui chian a ni thin,” an ti bawk. 

Aizawl veng pakhata naupang thihna chungchang hi social media hrang hrangah a darh a, a tirah chuan damlohna pangngai vang niin doctor-te chuan an ngai a, thil dik lo eng emaw awm nia rinhlelhna a awm zui avangin police-ten an chhui zui hnuah POCSO Act hmangin thubuai ziah luh a ni.

ZALEN thudawn danin naupang kumtlinglo boral ni chu kar kalta Inrinni, September 17, 2022 kha a ni.