Mizoram CSS Hindi Teachers Association (MCHTA) te chu Central atanga hun bi tiama rawih an nihna a tawp dawn avangin State Sawrkar ah dah ngheh chawngheiin  an phut a. Hun engngemaw chen Chief Minister office bulah inkulhin tunkar khan CM chenna In compound-ah  lutin police lam nen an intawng hnuah hnawh darh an ni a. Thenkhat chu man niin bond ziah tir an nih hnuah chhuah an ni leh ta a ni. Home Minister R. Lalzirliana chuan police khawmpuiah ram hruaitulu leh a chhungkua dinhmun derthawnga an dintir chu pawi a tih thu leh MRP leh Battalion lama sipaite zingah buaina rang taka tuk daih tur engngemaw zat awm a tul tawh nia a hriat thu a sawi chhuak a. CM pawhin rapid force mamawhna a awm tan nia a hriat thu a sawi bawk a ni. Hei bakah hian police te chu taksa ‘fit’  tha taka an awm a pawimawh thu ram hruaitute hian an sawichhuak  bawk a ni. Hmanni deuha National Women’s Commission atanga lo zin chuan jail enkawl a nih dan chu tha lo a tih thu media te a lo hrilh tawh bawk a, jail enkawltu police lal chuan hriatpui a nei tam lo ni hialin a sawichhuak tawh bawk a  ni. Kan ramhruaitute’n police te taksa ‘fit’ thaa an awm a ngai tih an sawi pawh hi a dik ang reng hle a. Kan police te hi chhuanawm tak tak an awm laiin tam tak chu ‘zu’ leh kaihhnawih vanga thi an ni tih pawh vantlang hriatpui ti ila thu kan uar lem lovang chu. Ram hruaitulu ber Pisa hi ram dangah chuan security a khirhna hmun ber pawh a ni thin a, luh mai mai theih a ni lo fo thin a ni. Kan state thenawm dinhmun ralmuang lemlova awm te angah phei chuan venhmina thuah tam tak nen security an inkulh pup a, mihring lut tur te dap an nih hnuah pawh khawl tha leh changkang inchhawpin chung khawl te chu pal tlang tir leh vek an ni thin a ni. Kan ram hi a ralmuan rei tawh avangin  force hman rup rup ngaihna a awm khat hle a, thil lawmawm lam tak pawh ni ang, hei vang hian venhimna lam hi kan lazam ta deuh nite pawhin a lang thei bawk a ni. Eng pawh nise tun tum thil thleng hi chu thawk leh khata thil thleng a ni chiah lova, zirtirtu nuar te pawh rei tak inkulh chilh tawh an ni a. An boruak pawh a ni telin a inlumleta,han sosan chang a awm zauh tawh a, uluk taka vil lehzual mamawh an ni tih a lang hle a ni. Zirtirtu chawnghei zinga chau zual nikhaw hrelo an awm vangin an thiante  thinrimin boruak tisosang zual pawh nise gate- pui nek tlanga, CMchenna In tual zawl luh mai theih a ni hi security lamah hlawhchhamna lian tak a awm tih hai rual a ni lova. Chief Minister office leh bunglow venhimna hi a tul a nih chuan ennawna rikrum thil a thlen pawha tun aia him zawk a nih theih nan siamthat nise a tha khawp mai.