Aizawl: Mizoram Police Canine Squad (ui fing) leina leh enkawlna atan a Combating Illicit Trafficking-in ND&PS scheme hnuai atanga hmuh Rs. 18,40,000/- chu hman zawh tawh niin pakaw dang lak belh turin hmalak leh mek a ni.

Police headquarters-a SPIO-in ZALEN zawhna RTI-a a chhan danin Mizoram Police Canine Squad hi July 21, 2020-ah home minister hovin induction ceremony neih a ni a. A tirah ui pariat leh a enkawltu (handler) 16 awmin, tun dinhmunah chuan ui pasarih leh a enkawltu 14 an awm. 

Narcotic Detection Dog (GSD) pakhat chu a hriselna a that loh avangin chawlhtir/condemn niin, JB Foundation-ah adopt tura hlan a ni. 

Canine Squad atan hian GSD leh Labrador te hman an ni a. Aizawl, Lunglei, Kolasib leh Champhaiah te duty tir an ni. Ui pakhat atan hian thla khatah Rs. 9,000 atanga Rs. 10,000 vel sen a ni thin.

Canine Squad hi kalpui chhunzawm zel tum a ni a. Tunah hian pakua lak belhna tur proposal chu central lamah thawn tawh a ni. 

Canine Squad hi Aizawl, Lunglei, Champhai leh Kolasib-ah te duty tir niin, a tulna apiangah hruai thin an ni.

Thubuai chhuinaah teltir an nih thin loh avangin thubuai chhuichhuah a la awm lo.

Ui pakhat zel hi an training tan tirh atangin handler leh asst. handler-in an enkawl a, tun thlengin an la enkawl chhunzawm.