Aizawl February 7, 2023 : MPCC President Lalsawta chuan Aizawl District Congress Committee huaihawta kum 2020-a Aizawl Municipal Corporation Election leh Local Council inthlana Congress Party Candidate-te intawhkhawmna a hmanpui naah Politics telna tlak lova ngai te chu duh loh te awpna hnuaiah an awmna niin a sawi.

Chanmari YMA Hall-a MPCC Office Bearer-ten hun an hmanpui naah Lalsawta chuan Politics hi tlanchhiatsan theih a ni lo a, mitin min hrut vek avangin ngaihven a ngai tih sawiin, "Mizoram buai lai pawh khan, Independent sual tul ti lo te pawh khan an tuar ve vek a, a tuar nasa pawh an ni maithei. Edmund Burke chuan, 'Politician te chu misual leh duham te an ni a, Politics tel ve na tlaka ngai lo te hremna chu; chung misual leh duham an tih te hnuaia kun chu a ni,' a ti. Politics hi telna tlaka kan ngai lo a nih chuan kan duh loh te awpna hnuaiah kan awm dawn tihna a ni. Chuvangin, politics tha kan neih theih nan theihtawp kan chhuah a ngai a ni," a ti.

MPCC President chuan, "Mizoram hi taimate leh thawk rimte dinchhuahna ramah siam kan tum. A dik lo leh mipui ti zawmthaw zawngin ram kan hruai dawn lo. Tang Puihna hi khawvel ram tinah mihring dinchhuahna bul a  ni. He Tang Puihna hmang hian kan thalaite leh eizawnna mumal nei lote tan eizawnna ngelnghet buatsaih sak a ni ang," a ti.