Dam takin kum thar te kan han thleng leh thei mai a, a lawmawm hle mai. Mizote pawh ram kil khawr taka awm ni mah ila khawvel dangte boruak tawn ang chu kan tawng chho ve zel a. Khawpui chhung ah ngat phei chuan pollution chi hrang hrang hian harsatna min siam tan ve mek a, hmun dangte pawn hei hi an la buaipui tur zel a nih hmel hle. Heng atan hian dan, ti mai ang, zawm tur tam tak a awm thin a ni. Mite tana thil tha tih hi a har hle a; mahse, heng dante hi kan zawm theuh theih chuan mi dangte tan mi tangkai awlsam tein kan lo ni reng thei a ni. Pathian min pek kan taksa leh ngaihtuahna te hrisel tha taka kan vawn hi kan mawhphurhna a ni a; tin, kan ram leilungte pawh keimahni ta, kan neih chhun a ni a, kan enkawl that a, kan vawn tlat a ngai a ni. Soil Pollution: Kan ram leilungte pawh tun hma ang lo takin kan duat a kan enkawl ngun a ngai ve ta. Mi ramte ang bawkin tun lai hmasawnnain min tuam ve zel a, thil a kal thui tak tak hmaa kan inven fimkhur a tha hle. A bik takin tawih thei lo, polythene, plastic, etc, kan hmang nasa hle a, hengte hi kan paih leh mai mai thin a, hengte hian kan leilung a ti bawlhhlawh (pollute) thei hle. Nakin lawkah hengte hian lei tawlh/min, a siam thei/thlen thei a, hetia kan paih mai hian a tawihral ve theih loh avangin lei karah te a awm reng a,chu chuan lei kha a titawlh/min duh bik em em a ni. Kan ram phei hi chu tlang ram a ni a, hemi vang kher lo pawh hian a min duh sa em em a ni. Tin, suan lam pang chi (battery)-te pawh hi paih mai mai loh tur a ni a, hengte hi chu kan leina dawrah emaw pek let leh mai tur a ni. Polythene bag hi kan ramah chuan sawi tawh angin hman khap a ni ve lo va, chuvang chuan kan hmang nasa hle a, khap tumna pawh a la awm chiah lo a ni mai thei, mi ramah chuan an khap tlat a, a aiah lehkha ip, mawi leh tha taka siam an hmang thin. Tunah harsatna la tawk hrih lo mah ila, ngaihtuahna kan sen tan chu a hun ve tawh hle mai. Air Pollution: Mi thiamte sawi danin boruak tihbawlhhlawh chungchangah hian mi ram ang em em chu kan la ni lo va, a chhan chu Industry, factory, etc, lian tham, boruak han tibawlhhlawhtu tur kan la neih loh vang a ni. Tun laia kan problem ber nia an sawi chu motor-ina a pek chhuah (khu) hi a ni. Aizawlah pawh tunah chuan lirthei hi a tam hle a, a tam mah mah tawh a ni. Hengte hian petrol leh diesel an hmang vek a, heng lirtheitena ni tin leh zan tina khu an pek chhuahte hi mihringte lo hip luh ve thin atan chuan a tha lo hle. Hriselna atana bithliah chin/pawm theih chin hi chu a awm ve a, thenkhatte hi chu kangmei a chhuak ta emaw tih mai turte hi an awm, a khu luih luih mai thin, a tha lo hle. Lirthei neitute pawhin kan motor-te enkawl ngun ila, mi dangte tan a pawi thei a ni tih kha theihngilh lo ila. Khua a lo thal chho leh tan dawn a, kan boruak tawn chhoh tur hrim hrimte pawh tlemin a lo bawlhhlawh (pollute) leh tan dawn a, kan fimkhur tlana kan inven that a tul hle. Chenna bul hnaia mei han chhem khuk luai luai mai te, bawlhhlawh han hal khuk chiam mai te pawh hi ngaihtuah chian chuan thil tih chi mang loh tak a ni. Keimahni leh kan thenawm khawvengte boruak hrisel lo tak kan hip luhtir a lo ni reng a ni. Thingkung leh hnim hring lam chihote hian boruak an tihthianghlim thin avangin kan tana tangkai em emte an ni a, chuvang chuan kan humhalh that a tul hle. Boruak thianghlim lo avang hian natna chi hrang hrang kan nei thei a ni tih hi i hre reng ang u. Noise Pollution: Pollution Control Board-in dan a neih ang chuan ri (bengchheng) rin zawng hi bithliah chin a awm thliah thliah a – Industrial area-ah chuti zat, Hospital area-ah, Bazaar, Residential area-ah, etc, chuti zat chin chu a ni tur a ni tih te. Awle, bengchheng hian mi a tibuai thei a, natna thenkhatte pawh a tizual thei a ni. Chenna hmunah phei chuan mi a tihrehawm thei hle a, zan mutte pawh nasa takin a tibuai thei a ni. Hetiang a nih avang hian thawm inneih khum chiam mai te, zan lama hla zir/music instrument ang chi tihrik chiam maite pawh hi thil tih chi a nih loh hmel hle. Hetih lai hian Mizote’n a mitthi lumen kan kalpui dante pawh hi a bul hnai leh thawm hre phakte tan chuan zan lungngaih thlak a nih ve hmel hle. Tunlaiin kohhrante kan hlim a, a tha e; mahse, kan lengkhawm zaite pawn lamah mic-in fit chhuak lo thei ila; tichuan, mi dangte tan harsatna kan thlen palh lo ngei ang. Tlawmngai pawl leh sawrkar lam tangkawp ten New Year zanah thalaite intihhlim nan hmun hrang hrangah concert-te an buatsaih thin a, a tha hle mai; mahse, hei pawh hi a bul hnai, thawm hre phak leh awm nem zawkte tan chuan lungngaihna thlentu mai a lo ni ve reng thei a ni. Tunlai khawvelah chuan naupang chauh, “Bengchheng s’u,” kan inti thei tawh lo, puitlingte hlei hlei hi khap ngai kan lo ni ve reng tawh mai. Aw le, vawiinah thu eng eng emaw kan han tar lang ve leh a, a then lai chu a famkim tawk lo hle mai thei a, hriat thiamna ka han ngen a, mihring tung chho zel turah heng kan han sawi takteho hi kan harsatna tawh chhoh ve zel tur a ni a, kan ngaih pawimawh thin pawh a ngai hle ang. Khawpui hrang hrangahte pawh an buaipui nasa hle thin a, keini chuan chuti takin kan la harsat phah hrih lo va, “Tihdam aiin inven a tha zawk,” tih ang deuh khan mi tinten tun hi hma kan lak hun lai tak turte pawh a nih hmel hle mai.