Aizawl : Health Minister Dr. R. Lalthangliana chuan nimin khan hri kai pun chak dan chu manganna tham a tling tawh a sawi hnu lawkah, Medical Operation team Chiarman Dr. ZR Thiamsanga chuan Lockdown pawh a tul leh theih thu a sawi a, sawrkar lam chuan Covid-19 positive te dahna tur pawh a dap chho mek zel a, positive enkawlna na hmun veng thenkhat chuan an nei tawh.
     
    Mizoram chhunga Covid-19 vei te enkawlna tur bika tih Zoram Medical College (ZMC) lamah damlo ten hmun an inchan lo a, sawrkar chuan damlo dahna tura Hotel leh Guest House te a hman tel hnuah pawh damlo an pun chak em avangin heng damlo dahna tur hi a ngaihtuah a, Health Minister hovin Thawhlehni pawh khan MINECO-a Account & Treasury office tur la luah loh leh Salem Venga Govt. Aizawl College hmunhma te pawh enfiah a ni. Vawiin pawh hian MINECO hmuna Rural Bank, Head Office sak thar leh Tuikual South-a Agriculture Directorate building pawh a en.

    Tun dinhmunah veng hrangah hrangah sawrkar hmunah leh Kohhran hmunah te Community Care Centre (3C) kalpui a ni a, positive te enkawlna tur bik Community Covid Care Centre (4C) erawh a la awm mumal lova, hemi kalpui thei tur hian sawrkar pawhin veng hrang hrang LLTF/VLTF te hnenah ngena a siam leh a, hemi ti tur hian veng hrang hrangin hma an la mek nia thu dawn a ni.
    
    ZALEN-in a biak chinah College Veng, Aizawl leh Bethlehem Vengthlang te chuan an veng chhungah heng covid-19 positive te enkawl hna hi an kalpui der tawh a, home isolation kalpui veng an awm bawk.

    College Veng hian 4C an kalpui mekah hian mi pasarih an dah mek a, pali hi chhungkua niin, mi dang pathum an awm bawk a, anni veng hian heng damlo te damdawi ei tur hi an tumsak mai bakah an taksa chakna tur Ayush damdawi a thlawnin an pe tel bawk. Anni hi hriat chinah veng anga 4C kalpui hmasaber an ni.
    
    Bethlehem Vengthlang hian CCC-ah positive leh anmahni enkawltu te nen mi 41 an kawl mek a, anni hian 4C neih tumin ruahmanna an siam a, an tihlawhtlin thuai an beisei.

    Veng chhunga CCC nei ngah ber zingami Ramhlun North chuan home isolation-ah mi pasarih awmna chhungkaw khat an dah mek a, anni bak hi hi chu positive enkawl an nei lo a, CCC ngah zingami Kulikawn chuan a tul anga 4C nei thei turin hma an la mek tih an sawi bawk.