Aizawl July 1, 2024: Vawiin khan ZPM General Headquarters Office, Upper Republic ah Chhung Inkhawm hun hman a ni a, P&E Minister chuan thu kalphung thar chu la zawh ngai loh kawng a nih avangin zirchian a ngai a ti a, current awm mumal loh thin chhan chu a hrui te thlak a nih thin vang a nih thu a sawi.

Marova chuan, “Kalphung thar Mipui Sawrkar hnuaiah Mizoram chuan tunhmaa kan la zawh ngai loh kawng kan zawh mek a, kum 37 chuang zet kalphung hluia kan lo kal tawh avangin mipuite leh Sawrkar Office-a thawktute pawhin ngaia kan lo neih tawh thil tam tak a awm a ni. Hei vang hian kalphung thar hi kan zirchian tlan a ngai a, kalphung thara kal thei turin kan indawm kan tawn a ngai hle bawk, tawngtaina nena min din pui tlat turin ram mipuite pawh ka sawm a ni," a ti.

Power & Electricity Department chungchâng sawiin F. Rodingliana chuan, "Tunlai hian Power Supply a khaihlak fo thin a, hei hi Distribution loss tih tlèm nan hrui tè zawkte hrui liana kan thlâk mêk vang a ni a, Aizawl atangin kan tan a, a tahtawl zela hmalak a nih avangin, kan lo thim zeuh zeuh a nih pawhin mipuite hriatthiamna kan han dîl a ni," a ti a, "Electric bill siamna atâna kum 2022 atanga software kan hman Virtuoso SAP Software hi kan duh khawp lo deuh a, meter reading manual a lak a, manual a entry chu tihsual a awm fo ṭhin avângin heng dik lo nuai bo nan hian RDSS hnuaiah smart meter reading tih tum a ni," a ti bawk.

Minister chuan, “SASCI Sum lapse chungchangah mi thenkhatin Sawrkar thar thiamloh ang lek lekin thu an thehdarh a, hei hi pawi ka ti hle a ni, Sawrkar hmasain SASCI sum a hman dan leh a kalpui dan zirchian chuan a bilha tho lo a ni a, ni khat thilthuah hna lian tak tak hmun 270 vela mi chu mi 43 hnenah pek chhuah a ni a, Election Model Code of Conduct in a phuar zui leh ta si a ni. Council Of Ministers thukhawm chuan ngun takin kan ngaihtuah a Utilization Certificate (UC) lem hmanga sum lapse tur dan beh ai chuan kan ram leh Sawrkain malsawmna kan dawn zel theih nan Pathian tihna avangin kan hnawl ta a ni. SASCI 2023-2024 hna ah hian Sawrkar thar hi a inrawlh lo hrim hrim a ni,” a ti.

Printing & Stationary Department hmalâkna sawiin, "Sikul naupang zirlaibu subject 46 atan copy 4,96,030 kan chhu a, sem chhuah hman vek a ni a, chhut belh mêk a ni a, a kawm hi tuam hran ngai lova laminate vek a ni a, a chhûng paper thlengin Delhi-a sawrkâr school-te nen danglamna a awm lo a ni," a ti.