ZALEN, Sept., 18, 2024: Synfo leh Central KTP tangkawp buatsaih, mal zai intihsiak, Praise On 2024 neih mekah Aizawl district bika audition-a inlan turin mi 300-in hming an pe.

Praise On 2024 audition hi Champhai, Serchhip leh Kolasib district-ah neih a ni tawh a, Aizawl bik hi September 25-28 chhung hian Tuikual Kohhranah audition neih a ni thung ang a. Inrinni hian Lungleiah neih a ni bawk ang.

District hrang hrangah audition neih tawhah hian Synfo-a thawkte bakah judge pathum - Upa F. Lalthanmawia, R. Lalrinmawii leh Michael Lalneihtluanga ten an telpui thin. 

Praise On Audition hi Hruaina Eng TV-a a chhuah bakah Synod Information YouTube channel-a dah zel a ni a. 1st round intihsiakna pawh TV leh YouTube-a en theih tura dah a ni dawn a, 2nd round atanga final thlengin Hruaina Eng TV leh YouTube-ah live-a pek chhuah a ni tawh thung ang.