ZALEN, August 29, 2025: Praise On 2024 Top 10-in a huhova an zaina music video hmasa ber, ‘I ropui nan’ tih hla chu an tichhuak a, he hla hi an zinga mite pahnih phuah ngat a ni nghe nghe.

Synod Information & Publicity (Synfo) leh Central KTP tangdunin KTP branch-te puala mi mala Pathian fakna hla sa thiam an thlanna, Praise On a buatsaih thina nikuma a sang zual 10-ten a huhova music video an siam hi Zirtawpni khan Synod Information YouTube channel-ah tihchhuah a ni.

‘I ropui nan’ tih hla hi Praise On 2024-a pathumna, Lalthlanawma, Ramhlun leh Samuel Lalmuanchhana, Armed Veng te phuah dun a ni.

“Keini Praise On 2024 Top 10-ten Pathian khawngaihnaa kan music video hmasa ber kan han khawr pum thei hi Pathian khawngaihna liau liau a ni a. Mi tam tak tan malsawmna a lo nih ngei kan beisei,” tiin an video hi YouTube-a an dah chhuahah an tar lang.

‘I ropui nan’ tih hla hi a music video leh audio hi Synfo kutchhuak a ni a, YouTube-a tlangzarh a nih rualin Hruaina Eng TV (LPS & Zonet)-ah dah chhuah a ni bawk.

Praise On 2024-ah khan C. Lalthanmawii, Luangmual West Branch, Aizawl chu pakhatna niin J.Lalruatsangi, Sihphir Branch chu pahnihna a ni a. An hla phuahtu zinga mi, Thlanawma hi pathumna a ni thung.

Top 10 music video-ah hian a phuahtute pahnih bakah Sailokima, Saizampuii, Ramdingdingliani, Zaithanmawii, C.Lalthanmawii, P.Vanlalhriatpuia, Maria Lalmuanpuii leh J.Lalruatsangi te an tel.