ZALEN, Oct. 24, 2024: Central KTP leh Synod Information Committee tangkawp buatsaih, malzai intihsiakna, Praise On Top 30 chu Ningani zan leh Zirtawpni zan hian Saron Veng Kohhhran Hall-ah neih a ni dawn a, sound track hmanga intihsiak a ni ang. 

Zan khatnaah mi 16 zain zan hnihnaah mi 14 an zai ang a, Pathian hla an duh ber an sa dawn a ni.

Top 30 atang hian Top 10 thlan chhuah an ni ang a, Top 10 intihsiakna hi November 7-8, 2024 chhung hian Dawrpui Kohhran Hall-ah neih a ni dawn a, live music-a rem a ni tawh ang.

Praise On 2024 hi district hrang hrangah audition round neih a nih hnuah October 14-16 chhung khan Saron Veng Kohhranah 1st round intihsiakna neih a ni a, hetah hian mi 117 intihsiakin Top 30 hi thlan chhuah an ni.

Praise On Mal zai intihsiakah pakhatnain Rs.1,20,000; pahnihnain Rs.70,000 leh pathumnain Rs.50,000 an dawng dawn a. Top 5 chinin Rs.15,000 an dawng ang a, Top 10 chinin Rs.10,000 an dawng bawk dawn a ni.

First round atangin Hruaina Eng TV (Zonet-12 & LPS-15) leh YouTube-ah live-a pekchhuah a ni.