ZALEN, Sept., 2026: KTP member-te tana buatsaih mal zai intihsiakna, Synod Information & Publicity (Synfo) chuan Central KTP tangkawp buatsaih, Praise On 2026 audition round result chu Zirtawpni zan khan puan a ni a, a tling mi 150-te chu September 21-26 chhung an intihsiak zui ang.

Audition round-ah hian video clip hmanga intihsiakna neih a ni a, second round lutte hi Synfo Studio-ah September 21-25 chhungin chhuhn lamah intihsiak chhunzawm tur a ni a. Hla thunawn nei a nih chuan chang khatna leh chang hnihna sak zawmin thunawn vawi khat chauh sak tur a ni a, thunawn nei lo hla a nih chuan chang thum sak tur a ni a, acoustic guitar leh keyboard hman theih a ni ang, September 25 zanah result puan a ni ang.

Mi 150 intihsiak atang hian mi 50 thlan chhuah leh an ni dawn a, Top 50-ah hian music track hmanga intihsiak tur a ni a, hla pakhat sak tur a ni a, hla sak chen tur hi second round ang tho a ni ang.

Top 50 intihsiakna hi October 21-23, 2026 chhungin zanah neih tur a ni a. Heta tang hian Top 10 thlan chhuah an ni ang a, November 19 leh 20, 2026 zanah YRC, Falkland, Aizawlah intihsiak zui a ni ang.

Top 10-ah hian hla pahnih, live instrument-a rem hmanga intihsiakna a ni dawn a. House band ruat saten an rem ang dawn a ni.

Praise On 2026 hi August 21, 2026 zan khan Synfo Studio-ah Synod Moderator Rev. John Raldosanga’n tawngtainain Pathian hnenah a hlanin bul tan a ni.

Kum 2016 atang khan Praise On - Mal Zai Intihsiak hi buatsaih tan a ni a. A hmasa berah hian Leitan nula, Lalrinmawii chu pakhatna a ni a, hun eng emaw chen an chawlh hnuah kum 2022 khan neih leh a ni a, hemi tuma pakhatna chu Malsawmdawngzuali a ni.

Praise On hnuhnung ber, kum 2024 khan Lalthanawma, Ramhlun chu pakhatna niin pahnihna chu Sihphir nula J Lalruatsangi a ni a. Pathumna hi Samuel Lalmuanchhana, Armed Veng tlangval a ni thung.

Kumin Intihsiakna kaihruaitu atan Eunik Lalnunfeli ruat a ni a. Intihsiakna lawmman atan pakhatna Rs. 1,20,000, pahnihna Rs. 70,000, pathumna Rs. 50,000 leh consolation prize (Top 10-a tling chin) Rs. 10,000 ruahman a ni.