ZALEN, Nov. 9, 2024: KTP member-te malzaia an intihsiakna, Praise On 2024 Top 5 a hriat ta a, boruak nei lian tak, J.Lalruatsangi pawh a la tel.

Ningani leh Zirtawpni zana Centenary Hall, Dawrpui Kohhran, Aizawla Top 10 intihsiakna neih a nih hnuah a tawp zan hian result puan nghal a ni.

Intihsiak zan khatnaah hian hla thlan sa panga zinga an pawh fuh lengkhawm hla hmangin an intihsiakna a, zan hnihnaah an hla duhzawng theuh an sa thung a, live music veka remsak an ni.

Top 5-a intihsiak hmachhawn zui turin tun hnaia boruak nei lian tak, Sihphir Branch nula, Ruatsangi a la tel a. A thiante pali nen hian November 21 zanah Dawrpui Kohhranah tho an intihsiak leh dawn a ni.

A thiam zual panga intihsiakah hian hla pahnih theuh an sa dawn a, pakhat hi anmahni duh zawng a ni ang a, pakhat chu judge pathum thuten an thlansak a ni ang.

Synod Information & Publicity Department (Synfo) leh Central Kristian Thalai Pawl (CKTP) tangdun buatsaih, Praise On 2024 hi district hrang hrangah audition round neih hmasak niin a tlingte chu October 14-16, 2024 chhung khan Saron Veng Kohhran, Aizawlah intihsiakin heta tang hian Top 30 thlan an ni.

Saron Vengah vek hian Top 30 intihsiakna chu October 24-25, 2024 chhung khan neih niin sound track hmangin an zai a, Top 10 thlan chhuah leh an ni a, tunah chuan panga chauh an awm ta a ni.

Kumin Praise On-ah hian pakhatna lawmman Rs. 1,20,000; pahnihna Rs. 70,000 leh pathumna Rs. 50,000 niin, Top 5 chinin Rs. 15,000 an dawng ang a, Top 10-a tling dangten Rs. 10,000 theuh an dawng bawk ang.

Top 5-a tlingte: 

1. J. Lalruatsangi (Sihphir Branch)

2. Lalthlanawma (Ramhlun Branch)

3. Maria Lalmuanpuii (Chhiahtlang Bazar Veng Branch)

4. P. Vanlalhriatpuia (Chaltlang South)

5. Samuel Lalmuanchhana (Armed Veng Branch)