ZALEN, Nov. 20, 2024: KTP member-te malzaia an intihsiakna, Praise On 2024 Top 5-te chu Ningani zan hian an intihsiak dawn ta a, hla hnih theuh an sa ang.

A thiam zual pangate hi anmahni duh zawng hla leh judge pathum thuten an thlansak sain an intihsiak dawn a ni.

Ningani zan hian Centenary Hall, Dawrpui Kohhran, Aizawlah intihsiak hi neih a ni dawn a, Zirtawpni zanah result puan a ni.

Synod Information & Publicity Department (Synfo) leh Central Kristian Thalai Pawl (CKTP) tangdun buatsaih, Praise On 2024 hi district hrang hrangah audition round neih hmasak niin a tlingte chu October 14-16, 2024 chhung khan Saron Veng Kohhran, Aizawlah intihsiakin heta tang hian Top 30 thlan an ni.

Saron Vengah vek hian Top 30 intihsiakna chu October 24-25, 2024 khan neih niin sound track hmangin an zai a, Top 10 thlan chhuah leh an ni a, tunah chuan panga chauh an awm ta a ni.

Kumin Praise On-ah hian pakhatna lawmman Rs. 1,20,000; pahnihna Rs. 70,000 leh pathumna Rs. 50,000 niin, Top 5 chinin Rs. 15,000 an dawng ang a, Top 10-a tling dangten Rs. 10,000 theuh an dawng bawk ang.

Top 5-a intihsiak turte: 

1. J. Lalruatsangi (Sihphir Branch)

2. Lalthlanawma (Ramhlun Branch)

3. Maria Lalmuanpuii (Chhiahtlang Bazar Veng Branch)

4. P. Vanlalhriatpuia (Chaltlang South)

5. Samuel Lalmuanchhana (Armed Veng Branch)