Premier League-a goal thun hi thil namai a nilo, minute 90 chhunga hat-trick siam ngat phei chu thil harsa tak a ni a, tuna kan player tarlan tur mi panga te erawh hi chuan minute 90 chu sawi loh minute 30 chhungin goal thum an thun thei zuk nia mawle. EPL-a hat-trick siam tur hi chuan thiam a ngaih piah lamah vanneih tel te pawh a ngai ta ve ang. 

Premier League history-a hat-trick siam rang ber player 5 te chu:

#1. Sadio Mane (16 minutes)

Sadio Mane hi 2014-15 season khan Red Bull Salzburg atangin Southampton-in an lei a, Senegalese forward hian a club thar tan danglamna thlenin a season hmasa berah Saints tan goal 10 a thun thei nghal. Kum 2014-15 season tawp dawn lam May thlaah Southampton hian Aston Villa an tlawh a. He hunah hian Mane hi a chetha hle a, Villa tana theihnghilh tawh loh tur hnuhma neiin minute 16 chhung lekin hat-trick a siam. Mane-a goal thumna hi yard 20-na vel atanga a thun niin Senegalese hi England lama a kal hnu hian player nghet ber zing a chhiar tel a ni. 

#2. Dwight Yorke (22 minutes)

Kum zabi 21-na tir lam khan Manchester United leh Arsenal te chuan Premier League an awp hneh hle a. Team pahnih te hian an tumpui te an hneh thei thin hle. Chutiang taka team tha pahnih mi ngam loh chu 2001 February thla khan an inkhel ta a, kha inkhelhah khan United chuan 6-1 zetin Arsenal chu an hneh ta mai a, entu mipui lam mak tih a hlawh hle nghe nghe. Inkhelh tan atanga minute hnih lekah Dwight Yorke chuan goal a khung ta mai a, Gunners lam chuan minute 14-naah an si phurh chu an sut leh nghal bawk. Inhnehtawk takin an khel chho dawn emaw tih laiin minute thum a ral tihin Yorke bawk chuan goal a khung leh a, minute 22 a nih meuh chuan Trinidad and Tobago striker hian hat-trick a siam der tawh. Season tawpah United chu Arsenal aia point 16 a sangin an champion ta a ni. 

#3. Kevin De Bruyne (24 minutes)

Premier League player khel mek zingah Kevin De Bruyne aia game tempo thlak danglam thei khawp player tha hi an awm lo hial ang. He Belgian midfielder aia hmuhnawm hi tunlai EPL player zingah an tam lo. May ni 11 khan Premier League Champion Manchester City hian Wolverhampton Wanderers lakah an zia chhuahin 5-1 zetin hnehna an chang. He inkhelhah hian De Bruyne chuan hma takah goal a thun a, Wolves lamin an si phurh an sut leh thuai naa Citizens lam hian goal 4 an thun belh leh. He inkhelhah hian De Bruyne chuan minute 24 chhungin hat-trick a siam a, thil danglam deuh pakhat chu hemi tuma De Bruyne-a goal thum thun hi a ke hman thiam loh lam, a ke vei lam vek a a tih luh an ni. 

#4. Jermaine Pennant (26 minutes)

Jermaine Pennant hian a football career chhungin English club hrang hrangah a khel kual a, Arsenal tana a khelh hi mi tam zawk chuan an hre lo hial mai thei. A chhan chu season ruk chhung zet loan-in club hrang hrangah a khel kual a ni. 2003 May thla khan kum 20 mi Pennant chuan Southampton lakah a Premier League debut game a khel a, he game-ah hian minute 23 chhungin Roberto Pires nen goal hnih ve ve an thun der. Englishman hian minute thum hnuah goal khat thun lehin club tana a inlanna hmasa berah hat-trick a siam riap mai. Hemi tum hian Gunners hi 6-1 in an chak. 

#5 Ian Marshall (27 minutes)

Ian Marshall hi Leicester City tan season li chhung a khel a, Derby match-ah 1997 khan Foxes tana game chhinchhiah tlak khelin Marshall hian minute 27 chhungin hat-trick a siam der. Inkhelh a tawp meuh chuan Foxes hi 4-2 in an chak a, he inkhelhah hian Marshall hi a langsar lawr lak bawk.