Hming langsar leh player tha nei, England hian an ram mipui te beisei anga game an la khelh chhuah phak loh vangin sawisel tawk nasa hle a, an manager Gareth Southgate-a leh a nau te hian zirtawpni zan zanlai khan pressure sang tak hnuaiah an ram thenawm Scotland chu an mual chhuanvawr Wembley Stadium-ah an lo mikhual a, goal awm lovin an draw. 

Kum 2018 World Cup khan Gareth Southgate-a hnuaia goal thum chauh thun chungin  semi final an lut thei a, kumin hian  England hian player mal khai pawha lar leh thiam tak tak an ngah vangin beisei an nei sang hle. Mahse, an player neih that ngaihtuahin an khel tha theilo thung. England hian an team aia team chhe zawk a ngaih Scotland lakah hian goal an thun thei lo leh a, tunah hian point thum an neih sa nen point li neiin an group atanga Round of 16 lut hmasa ber nihna hun tha an bawh pelh.

Tum dang pawha an harsatna tawh lian ber thin, goal thun kawngah Three Lions hi harsatna an tawk leh a, zirtawpni zan inkhelhah pawh hian an harsatna lian ber a ni nileh pek a, club tana goal thun thei tak an striker Harry Kane pawh a che hlei thei lo. 

Zirtawpni zan inkhelhah phei kha chuan pass complete vawi hnih chiah neiin vawi 1 chiah shot a nei a, chu pawh target zawnah a kal lo. Minute 45 chhungin ball vawi 10 chiah a tawk a, hetatang ringawt pawh hian England-in goal thun an harsat tur zia a hriatthiam theih mai awm e. 

England captain hi England in nghahna pawimawh lian tak a ni chungin a chet fuh theih loh vangin minute 74-naah Marcus Rashford-a’n a rawn thlak a, Inkhelh chhung zawng a, ball vawi 19 chiah a tawh kha ram tana international match a khelh tawh a minute 45 chhunga ball a tawh tlem ber tum a ni nghe nghe.          Scotland tana inkhel bul a tan vawi khatnaah Chelsea midfielder naupang Billy Gilmour chu Scotland tan a khel tha hle a, Star of the Match a thlan a ni. 

He inkhelh-a England player kum chawhrual hi hi England starting line up kum chawhruala an naupan ber tum a ni nghe nghe.

Minute 12-na lekah England hian corner an hlawh chhuak a, corner atanga ball rawn thlawk phei chu sang zet a zuangin John Stones chuan a lo tauh a, goal ban a fuh dawt a, a goal lo hlauh.  England hian ball an chang tam zawk a, chutihrualin goal hlauhawm erawh an nei tlem hle.