ZALEN, Apr. 29, 2026: July, 2023-a sak tan, Rs. vaibelchhe 18.25 man, Suaka Cricket Ground (SCG)-a Indoor Cricket Academy chu Thawhlehni khan Prime Minister Narendra Modi-a’n Sikkim atangin a hawng.

Sihhmuia Modi-a hawn tak hmun hi Cricket Association of Mizoram (CAM)-in India cricket pawl, Board of Control for Cricket in India (BCCI) atanga sum a hmuh hmanga a din a ni.

Indoor Cricket Academy hi tun lai khawvel thiamna leh changkang ber bera thiam niin cricket chawi kan zel nan a khelh zirna, a khelte fitness leh awm hahdamna hmun atana duan a ni.

Mizo pa chhiara chhawng hniha sang inah hian a chhawng hnuai (ground floor)-ah gymnasium, tui chenna, cafeteria, electrical room, IT room, hmeichhia leh mipa tan an bungrua an dah thatna locker room hrang, ice bath area, massage/recovery zone, inkhai chhuk-chhohna, staircase leh awm hahdamna hmun siam a ni.

A chhawng chungah hian indoor cricket practice pitch, lift lobby, a hmunhma enkawltute pisa, hmanraw dah khawmna pindan bakah khawthlirna hmun tha tak siam a ni bawk.

In chhawng hnihah hian inthiarna pawh tha tak a awm ve ve a, pianphunga rualbanlote pawh harsa lo taka an tih theihna turin an tan remchang dah vek a ni bawk.

Indoor Cricket Academy awmna, SCG hi CAM-in khelmual pangngai a neih chhun a ni a. Kum 2010 khan a sakna tur lung phumin DoNER ministry atanga Rs vaibelchhe 11 hmuh hmanga bul tan a ni a, inkhelh theihna peih a nih hnuah May 23, 2014 khan CAM kuta hlan niin tun thlengin a tihchangtlun hna hi thawh mek zel a ni.

2024-25 season khan CAM hian an khelmual thuam thar zelna atan Rs. vaibelchhe 17.5 a dah a. 2025-26 pawh hian budget Rs. nuai 2,850 an neiha a zahve aia tam, Rs. 15,85,24,000 chu hmun hrang hranga khelmual an neih leh an sak mek cheibawla sak chhunzawm nan leh tuaihnum nan an dah a. Sihhmuia mi tan bik hian Rs. nuai 50 ruahmanin pavillion building thar, hostel leh club sak nan leh khelmual enkawl zui nan an ti.

SCG hi a hmun petu, Lal Rotluanga pa hming chawia a hming hi an phuah a ni.