British lal Prince Philip chu kum 99 mi niin an ram huna Zirtawpni zing lam khan a thi tih, Buckingham Palace chuan a puang. 

Duke of Edinburgh thih thu hian khawvel a deng chhuak rang hle a, ram hruaitu atanga amah ngaisangtu thengin uina thu an tarlang nasa hle. 

Prince Philip hi Queen Elizabeth II pasal niin, British lal chhungkaw chanchinah hmun pawimawh a luah reng tawh dawn a, kum 60 vel zet chu lal chhungkaw tan dinhmun pawimawh tak a lo chelh tawh a ni. 

British Prime Minister Boris Johnson chuan Prince Philip sunna thu a sawi a, a ui zia a tarlang. 

PM hian Downing Street-a thu a sawiah Prince Philip chu United Kingdom tana mi tangkai a nih thu leh Commonwealth leh khawvel ram hrang hrang tana hna thawhte chu chhuanawm a tih thu a sawi a ni. 

Mipui thahnem tak chu Windsor Castle-ah an pungkhawm a, Prince Philip thlahna pangpar an dah a ni. Nimin khan London, Edinburgh, Cardiff leh Belfast-ahte a pualin hun hman a ni bawk. 

Prince Philip vuina hun hi St George's Chapel, Windsor-ah buatsaih a ni a, hripui leng avangin a hmunah mipui an tel tam thei dawn lo thung. 

Prince Philip leh Queen Elizabeth te hi kum 1947 khan an innei a, fa pali, tu pariat leh tuchhuan 10 an nei a ni. An fa hmasa ber Prince Charles (Prince of Wales) chu 1948 khan a piang a, Princess Anne (1950), Prince Andrew (1960) leh Prince Edward(1964) te chu inhlat tak takin an piang ve leh a ni. 

Prince Philip hi Greek island-a Corfu-ah June 10, 1921 khan a piang a, a pa chu Greece leh Denmark lal Prince Andrew a ni. A nu hi Prince Louis fanu Princess Alice a ni.