Princess of Wales Kate Middleton chu a cancer tih Zirtawpni zan khan puan a ni. A cancer chungchangah hian video a tichhuak a, khawngaihtu leh lainattu pawh a ngah hle. 

Kum 42 mi Kate Middleton cancer hi a stage a la sang lo a, mahse a natna hian amah pawh a tihrilh hai hle tih a sawi. Thla hnih dawn chu vantlang hmaah a inlan tawh lo a, a chanchin hian zawhna pawh a siam hnem hle. January thla khan zai a tawk a, hemi chungchang hi chu Kensington Palace pawhin an puang. Mahse a reh rei tak deuh avangin a chanchin hian ngaihven a hlawh zual a, amah ngeiin cancer an hmuhchhuah thu hi a rawn puang ta a ni. 

Prince William-a nupui Kate chuan,"January khan London-ah abdominal surgery hlawhtling takin ka nei a, cancer hlauhthawnawm a awm lo. Mahse min zai hnua test kan neih leh result-ah ka lo cancer a, min thawng tak zet a ni," tiin a sawi. "Medical team ten min buaipui nghal a, chemotherapy ka la ang, tunah chuan a stage a la snag lo hlauh e," tiin ngaihtuah lutuk a nih loh thu a sawi. 

British lal chhungkua hian hun khirh tak an tawng chho mawlh mawlh a, King Charles III pawh tunah hian cancer vanga enkawl mek a ni. A cancer thu hi Buckingham Palace chuan February khan an lo puang tawh a nih kha, tunah Kate Middleton a caner thu puan a ni ve leh ta hian khawvel a deng chhuak hneh hle a ni. 

Kate thlavang hauhtu Trump

Kate Middleton hian tun hnai khan a fate nena an thlalak chu social media-ah a pholang a, mahse a thlalak edit a fuh vak loh avangin sawisel a tawk nasa hle. Hemi chungchangah hian thupha chawinate pawh a siam a, hetih lai hian pa maksak ve tak US President hlui Donald Trump erawh chuan Kate Middleton hi a tan ve tlat thung a ni.

Kate Middleton hian chanchin duhawm lam hriat tur a nei hman a, zai a tawh hnuah that lam a pan chho leh mek avangin a hna pawh in lam atangin a thawk leh thei tawh tih tarlan a ni. Princess Of Wales hi Royal Foundation Centre for Early Childhood enkawltu a ni a, zai a tawh avang hian a hna hi hun eng emaw tichhung chu a lo chawlhsan tawh a ni. Mahse hetianga thu tha lam hriat tur a awm hnu lawk hian a cancer thu puan a ni leh ta si a, a lainatawm hle a ni. 

\\\\\\